عمران خان نے حکومت سے مذاکرات کو مسترد کر دیا، اسٹیبلشمنٹ سے رابطے کیلئے تیار

اسٹیبلشمنٹ سے بات چیت کے دروازے بند نہیں کیے

اسلام آباد: چیئرمین پاکستان تحریک انصاف اور سابق وزیراعظم عمران خان نے تصدیق کی ہے کہ انہوں نے پارٹی رہنما اعظم سواتی کو ملٹری اسٹیبلشمنٹ سے رابطہ کرنے کی ہدایت دی ہے۔ عمران خان نے یہ بات اڈیالہ جیل میں پارٹی رہنماؤں اور وکلاء سے ملاقات کے دوران کی، جس میں واضح کیا کہ ان کی کوششیں کسی قانونی رعایت کیلئے نہیں بلکہ پاکستان کے مفاد میں ہیں۔

حکومت کے ساتھ مذاکرات ختم

ذرائع کے مطابق عمران خان نے اس بات پر زور دیا کہ وہ حکومت کے ساتھ مذاکرات کا دروازہ بند کر چکے ہیں کیونکہ موجودہ حکومت کو اصل اختیارات حاصل نہیں۔ انہوں نے کہا کہ ’’ہم نے کبھی اسٹیبلشمنٹ کے ساتھ بات چیت کے دروازے بند نہیں کیے، لیکن موجودہ حکومت سے مذاکرات بے معنی ہیں۔‘‘

ویڈیو بیان کا پس منظر

اس ملاقات میں سینیٹر علی ظفر نے اعظم سواتی کے حالیہ ویڈیو بیان پر عمران خان سے وضاحت طلب کی، جس میں سواتی نے کہا تھا کہ عمران خان نے انہیں اسٹیبلشمنٹ سے خفیہ بات چیت شروع کرنے کی ذمہ داری سونپی۔ عمران خان نے اس کی تصدیق کی اور واضح کیا کہ ان کا مقصد صرف پاکستان، جمہوریت، اور عوام کے مینڈیٹ کی بحالی ہے، نہ کہ ذاتی مفادات یا قانونی ریلیف۔

عدالتی جنگ جاری رکھنے کا عزم

عمران خان نے کہا کہ وہ عدالت میں اپنی قانونی جنگ جاری رکھیں گے اور کسی بھی خفیہ رعایت کے خواہاں نہیں۔ انہوں نے اعادہ کیا کہ اسٹیبلشمنٹ کے ساتھ کھلی اور باوقار بات چیت کے حامی ہیں تاکہ ملک کو آئینی و سیاسی بحران سے نکالا جا سکے۔

یہ بھی پڑھیں:عمران خان کی 24 نومبر کو اسلام آباد میں مارچ کی فائنل کال