نواز شریف کی لندن میں گفتگو
لندن میں صحافیوں سے گفتگو کرتے ہوئے مسلم لیگ ن کے قائد اور سابق وزیراعظم نواز شریف نے کہا کہ وزیراعظم شہباز شریف کی قیادت میں پاکستان درست سمت میں گامزن ہے اور وہ بہترین انداز میں فرائض انجام دے رہے ہیں۔ انہوں نے کہا کہ معیشت کو سنبھالا دینے اور عوامی مسائل کے حل میں حکومت کی کارکردگی قابلِ تعریف ہے۔
معیشت کو پاؤں پر کھڑا کیا
نواز شریف کا کہنا تھا کہ شہباز شریف نے گرتی ہوئی معیشت کو دوبارہ اپنے پاؤں پر کھڑا کیا ہے۔ انہوں نے کہا کہ پاکستان کو دیوالیہ ہونے سے بچایا گیا، اور اب تمام کام میرٹ پر ہو رہے ہیں۔ نواز شریف نے کہا کہ سب کو پاکستان کی ترقی میں اپنا کردار ادا کرنا ہوگا تاکہ ملک ایک بار پھر استحکام کی طرف بڑھے۔
مریم نواز کا کردار
نواز شریف نے پنجاب کی ترقی کے حوالے سے کہا کہ مریم نواز نے صوبے میں ترقی کی نئی راہیں کھول دی ہیں، اور وہ کوئی بھی کام میرٹ کے خلاف نہیں کر رہیں۔ انہوں نے کہا کہ لاہور کی بحالی کے لیے متعدد منصوبے جاری ہیں جن سے شہر کی اصل شناخت بحال کی جائے گی۔
تحریک انصاف پر تنقید
سابق وزیراعظم نے تحریک انصاف کی پالیسیوں پر تنقید کرتے ہوئے کہا کہ انہی غلط فیصلوں کی وجہ سے پاکستان اس نازک دور سے گزرا۔ ان کا کہنا تھا کہ قومی ایئرلائن کو بند کروانے کی کوشش کرنے والوں کے خلاف قانونی کارروائی ہونی چاہیے، کیونکہ یہ پاکستان کے مفاد کے خلاف ہے۔
صحت سے متعلق افواہوں کی تردید
صحافیوں کے سوال پر نواز شریف نے اپنی صحت کے حوالے سے خبروں کو غلط قرار دیا اور کہا کہ وہ مکمل طور پر صحت مند ہیں اور ان کے بارے میں پھیلائی جانے والی افواہیں بے بنیاد ہیں۔
یہ بھی پڑھیں:طویل عرصے بعد بلآخر نواز شریف کی سیاسی میدان میں واپسی