انسداد دہشت گردی عدالت کا فیصلہ
گوجرانوالہ کی انسداد دہشت گردی عدالت نے وزیرآباد میں بانی پی ٹی آئی عمران خان کی ریلی پر فائرنگ اور حملے کے کیس کے مرکزی ملزم نوید کو دو بار عمر قید کی سزا سنادی ہے۔ عدالت میں 3 نومبر 2022 کو وزیرآباد میں ریلی کے دوران ہونے والے حملے کے کیس کی سماعت ہوئی۔
ملزم نوید کو دو بار عمر قید
عدالت نے فیصلہ سناتے ہوئے نوید احمد کو معظم کے قتل کے جرم میں ایک مرتبہ اور دہشت گردی کا جرم ثابت ہونے پر ایک مرتبہ مزید عمر قید کی سزا سنائی۔ ملزم کو چار افراد کو زخمی کرنے کے الزام میں تین سے پانچ سال قید کی سزا بھی دی گئی، اور پانچ لاکھ روپے جرمانہ بھی عائد کیا گیا۔
دیگر ملزمان کی بریت
عدالت نے مقدمے میں نامزد دیگر دو ملزمان طیب بٹ اور وقاص کو ناکافی ثبوتوں کی بناء پر بری کر دیا۔ عدالت نے بانی پی ٹی آئی عمران خان کی جانب سے عدم پیروی پر حق صفائی ختم کر دیا، جس کے دوران عمران خان کو آٹھ مرتبہ طلب کیا گیا مگر وہ بطور گواہ بیان ریکارڈ نہ کرا سکے۔
حملے کی تفصیلات
یاد رہے کہ 3 نومبر 2022 کو وزیرآباد میں عمران خان کے لانگ مارچ کے دوران کنٹینر پر فائرنگ کی گئی تھی جس کے نتیجے میں معظم نامی شخص جاں بحق اور عمران خان سمیت 13 افراد زخمی ہوئے تھے۔ پولیس نے جائے وقوعہ سے حملہ آور نوید احمد کو گرفتار کر لیا تھا۔ بانی پی ٹی آئی نے حملے کا الزام رانا ثناءاللہ، شہباز شریف اور مسلم لیگ (ن) کی قیادت پر لگایا تھا۔
یہ بھی پڑھیں:پاکستانی احمدی شہری مشتعل ہجوم کے ہاتھوں قتل