مودی ایک ہارے ہوئے جواری کی طرح تقریر کر رہے تھے جس کے پلے کچھ نہیں: خواجہ آصف

مودی کی تقریر پر خواجہ آصف کا ردعمل

وفاقی وزیر دفاع خواجہ آصف نے بھارتی وزیراعظم نریندر مودی کی حالیہ تقریر پر شدید ردعمل دیتے ہوئے کہا ہے کہ مودی نے اپنی گرتی ہوئی ساکھ کو بچانے کی ناکام کوشش کی ہے۔ جیو نیوز کے پروگرام “آج شاہ زیب خانزادہ کے ساتھ” میں گفتگو کرتے ہوئے انہوں نے کہا کہ مودی ایک ہارے ہوئے جواری کی طرح بول رہے تھے جس کے پاس کہنے کو کچھ نہیں بچا۔

مودی کا کشمیر اور دہشتگردی پر موقف تبدیل

خواجہ آصف کے مطابق نریندر مودی نے پہلی بار کشمیر اور دہشتگردی کے معاملے کو قابل گفتگو تسلیم کیا ہے، جو اس بات کی علامت ہے کہ بھارت دباؤ میں ہے۔ انہوں نے کہا کہ مودی کی جانب سے پاکستان پر لگائے گئے الزامات کی تحقیقات ہونی چاہیے، کیونکہ مودی خود دنیا کے سب سے بڑے سرٹیفائیڈ دہشتگرد ہیں۔

بھارت کی دہشتگرد تنظیموں سے وابستگی

وزیر دفاع نے کہا کہ پاکستان کو حالیہ کشیدگی میں ہر محاذ پر کامیابی ملی ہے۔ ان کا کہنا تھا کہ بھارت کی سرپرستی میں کام کرنے والی تنظیمیں، جیسے کہ بی ایل اے، پاکستان میں دہشتگردی کی وارداتوں میں ملوث ہیں۔ اگر بھارت دہشتگردی پر بات کرے گا تو پاکستان فوراً پہلگام واقعے کی غیرجانبدار تحقیقات کا مطالبہ کرے گا۔

مذاکرات کا ایجنڈا اور کشمیر کا مقدمہ

خواجہ آصف نے کہا کہ اگر پاک بھارت مذاکرات ہوئے تو ان کے ایجنڈے میں سرفہرست مسئلہ کشمیر ہوگا۔ ان کا کہنا تھا کہ میری معلومات کے مطابق فی الحال کسی مذاکراتی مقام کا تعین نہیں ہوا لیکن اگر ملاقات ہوتی ہے تو کشمیر، سندھ طاس معاہدہ اور دہشتگردی بنیادی نکات ہوں گے۔ انہوں نے واضح کیا کہ بھارت نے ٹی ٹی پی اور بی ایل اے کے ذریعے مغربی سرحد پر حملے کروائے ہیں۔

امریکہ کا ممکنہ کردار اور عالمی صورتحال

خواجہ آصف کے مطابق امریکی صدر ڈونلڈ ٹرمپ نے مسئلہ کشمیر میں کردار ادا کرنے کی پیشکش کی ہے۔ انہوں نے کہا کہ امریکا دنیا بھر کے فلیش پوائنٹس پر کردار ادا کر رہا ہے، جیسے یوکرین، غزہ اور فلسطین۔ پاکستان میں قیام امن کے حوالے سے بھی امریکی کردار قابلِ ذکر رہا ہے۔

نریندر مودی کی آف کلر تقریر

یاد رہے کہ نریندر مودی نے قوم سے خطاب کیا جس میں وہ غیرمعمولی طور پر کمزور نظر آئے۔ انہوں نے پہلگام واقعے کو ظلم قرار دیتے ہوئے ایک بار پھر پاکستان پر الزامات دہرائے لیکن ان کی تقریر میں اعتماد کی کمی نمایاں تھی، جو بھارت کی اندرونی اور بیرونی دباؤ کی عکاسی کرتی ہے۔

یہ بھی پڑھیں:مودی کی سیاسی پوزیشن پاکستان کے فوجی ردعمل سے کمزور پڑ گئی: امریکی میڈیا