چائے نہ صرف دنیا کا مقبول ترین مشروب ہے بلکہ اب ایک نئی سائنسی تحقیق نے یہ بھی ثابت کیا ہے کہ اس کا روزمرہ استعمال انسانی صحت پر انتہائی مثبت اثرات مرتب کرتا ہے۔
صحت مند زندگی کیلئے چائے مفید
نئی تحقیق کے مطابق روزانہ دو کپ چائے پینا لمبی اور صحت مند زندگی کے لیے معاون ثابت ہو سکتا ہے۔ تحقیق میں بتایا گیا ہے کہ چائے میں موجود “فلیونوئڈز” نامی قدرتی مرکبات مختلف سنگین بیماریوں جیسے ذیابیطس ٹائپ 2، دل کی شریانوں کے امراض، کینسر اور دماغی بیماریوں سے بچاؤ میں مدد فراہم کرتے ہیں۔
500 ملی گرام فلیونوئڈز سے موت کا خطرہ 16 فیصد کم
تحقیق میں 40 سے 70 سال کی عمر کے 1 لاکھ 20 ہزار افراد کی صحت کا 10 سال تک مشاہدہ کیا گیا۔ ماہرین نے دریافت کیا کہ روزانہ 500 ملی گرام فلیونوئڈز کا استعمال کسی بھی وجہ سے موت کے خطرے کو 16 فیصد جبکہ دل کے امراض، ذیابیطس اور نظامِ تنفس کی بیماریوں کے امکانات کو 10 فیصد تک کم کر دیتا ہے۔
چائے کے ساتھ دیگر غذائیں بھی فائدہ مند
تحقیق میں بتایا گیا کہ فلیونوئڈز صرف چائے ہی نہیں بلکہ بیریز، ڈارک چاکلیٹ، سیب، مالٹے اور انگور جیسے پھلوں میں بھی بڑی مقدار میں پائے جاتے ہیں۔ یہ مرکبات جسم میں بلڈ پریشر کو کنٹرول، کولیسٹرول میں کمی، اور سوزش سے تحفظ جیسے اہم کردار ادا کرتے ہیں۔
محققین کی تجویز
ماہرین نے تجویز دی کہ روزانہ کی خوراک میں فلیونوئڈز سے بھرپور مختلف اقسام کی غذاؤں کا استعمال یقینی بنانا چاہیے تاکہ مجموعی صحت کو فائدہ پہنچایا جا سکے۔
تحقیق کی اشاعت
یہ تحقیق بین الاقوامی سائنسی جریدے “نیچر فوڈ” (Nature Food) میں شائع کی گئی ہے اور اسے اس میدان میں ایک اہم پیشرفت قرار دیا جا رہا ہے۔
یہ بھی پڑھیں: چائے پینا پسند کرتے ہیں تو اس کا یہ فائدہ ضرور جان لینا چاہیے