گرمیوں کا موسم جسم سے اضافی پانی اور نمکیات نکال دیتا ہے جس سے نہ صرف تھکن محسوس ہوتی ہے بلکہ جلد بھی بے رونق دکھائی دیتی ہے۔ ایسے میں اگر روزانہ کی بنیاد پر ڈیٹاکس واٹر کا استعمال کیا جائے تو نہ صرف جسم میں ٹھنڈک برقرار رہتی ہے بلکہ وزن کم کرنے، جلد کو تروتازہ رکھنے اور نظام ہاضمہ کو بہتر بنانے میں بھی مدد ملتی ہے۔
ڈیٹاکس واٹر بنانے کا طریقہ
ڈیٹاکس واٹر بنانا نہایت آسان ہے۔ ایک جگ پانی میں چند قدرتی اجزاء شامل کر کے اسے کچھ دیر کے لیے چھوڑ دیا جاتا ہے تاکہ اجزاء کی خوبیاں پانی میں شامل ہو جائیں۔ درج ذیل اجزاء آپ آسانی سے استعمال کر سکتی ہیں:
ایک عدد کھیرا (باریک کٹا ہوا)
آدھی لیموں (سلائس میں کٹی ہوئی)
چند پتے تازہ پودینے کے
ادرک کے دو سے تین باریک ٹکڑے
اگر چاہیں تو تھوڑے سے بیری یا اسٹرابری بھی شامل کی جا سکتی ہیں
یہ تمام اجزاء ایک جگ ٹھنڈے پانی میں ڈال کر 4 سے 5 گھنٹے یا پوری رات کے لیے فریج میں رکھیں۔ صبح نہار منہ اور دن بھر وقفے وقفے سے پیئیں۔
ڈیٹاکس واٹر کے فائدے
وزن میں کمی: کھیرا، لیموں اور ادرک جسم میں موجود اضافی چربی کو گھلانے میں مدد دیتے ہیں۔
جلد کی چمک: پانی اور اینٹی آکسیڈنٹس جلد کو صاف اور چمکدار بناتے ہیں۔
گرمی میں جسم کی ٹھنڈک: ڈیٹاکس واٹر جسم کو ہائیڈریٹ اور ٹھنڈا رکھتا ہے، خاص طور پر گرمیوں کے دنوں میں۔
نظام ہضم کی بہتری: ادرک اور پودینہ ہاضمے کے مسائل کو کم کرتے ہیں۔
ذہنی تازگی: مسلسل پانی پینے سے جسم اور دماغ دونوں کو سکون ملتا ہے۔
استعمال کا طریقہ
گرمیوں میں روزانہ کم از کم 1 سے 1.5 لیٹر ڈیٹاکس واٹر پینا مفید رہتا ہے۔ نہار منہ اور کھانے کے بعد پینے سے زیادہ فائدہ ہوتا ہے۔ اس کے ساتھ تلی ہوئی اشیاء سے پرہیز اور ہلکی پھلکی ورزش وزن کم کرنے کے عمل کو مزید تیز کر دیتی ہے۔
احتیاط: ذیابیطس، بلڈ پریشر یا کوئی بھی میڈیکل مسئلہ ہو تو ڈیٹاکس واٹر کے استعمال سے قبل اپنے ڈاکٹر سے مشورہ ضرور کریں۔