پاکستان سمیت دنیا بھر میں مسیحی برادری آج ایسٹر کا تہوار منا رہی ہے

ایسٹر کی تقریبات اور عبادات

پاکستان سمیت دنیا بھر میں مسیحی برادری آج ایسٹر کا تہوار جوش و خروش سے منا رہی ہے۔ اس دن کی مناسبت سے ملک بھر کے گرجا گھروں میں خصوصی عبادات اور مذہبی تقریبات منعقد ہوئیں جن میں پاکستان کی ترقی، خوشحالی، قومی اتحاد اور مذہبی ہم آہنگی کے لیے دعائیں کی گئیں۔ لاہور، کراچی، اسلام آباد، پشاور اور کوئٹہ سمیت تمام بڑے شہروں کے گرجا گھروں میں سیکیورٹی کے سخت انتظامات کیے گئے تاکہ عبادات میں شرکت کرنے والوں کو تحفظ فراہم کیا جا سکے۔

صدر اور وزیراعظم کی جانب سے مبارکباد

صدرِ مملکت آصف علی زرداری اور وزیراعظم شہباز شریف نے اس مقدس تہوار کے موقع پر مسیحی برادری کو دل کی گہرائیوں سے ایسٹر کی مبارکباد دی۔ اپنے الگ الگ پیغامات میں دونوں رہنماؤں نے مسیحی برادری کی ملک کیلئے خدمات کو سراہا۔

صدر مملکت آصف زرداری کا پیغام

صدر آصف علی زرداری نے اپنے بیان میں کہا کہ مسیحی برادری پاکستان کا قیمتی اثاثہ ہے۔ انہوں نے کہا کہ آئین پاکستان تمام اقلیتوں کو برابر کے حقوق فراہم کرتا ہے اور ان کے تحفظ کا ضامن ہے۔ صدر نے زور دیا کہ پاکستان کی ترقی اور استحکام کیلئے تمام اقلیتوں سمیت پوری قوم کو مل کر کردار ادا کرنا ہو گا۔

وزیراعظم شہباز شریف کا پیغام

وزیراعظم شہباز شریف نے کہا کہ ایسٹر تجدید اور اُمید کا پیغام ہے۔ ان کے مطابق حضرت عیسیٰ علیہ السلام کا پیغام پوری انسانیت کے لیے امن، محبت، انکساری اور ایثار کا سبق ہے۔ وزیراعظم نے کہا کہ مسیحی برادری کی خدمات، دیانتداری اور محنت پاکستان کے لیے باعث فخر ہیں۔ انہوں نے اس موقع پر بین المذاہب ہم آہنگی، رواداری اور قومی یکجہتی کو فروغ دینے کی ضرورت پر زور دیا۔

مسیحی برادری کے کردار کو سراہا گیا

وزیراعظم شہباز شریف نے پاکستان کی تعمیر و ترقی میں مسیحی برادری کے اہم کردار کو خراجِ تحسین پیش کیا۔ ان کا کہنا تھا کہ مجھے یقین ہے کہ مسیحی برادری آئندہ بھی پُرامن اور خوشحال پاکستان کی تشکیل میں اپنی بھرپور خدمات جاری رکھے گی۔

یہ بھی پڑھیں:قراردادِ پاکستان 23 مارچ 1940ء کی تاریخی اہمیت اور یومِ پاکستان