عمران خان سے جیل میں امریکی پاکستانی شخص کی ملاقات کا انکشاف
جیل میں خفیہ ملاقات کی تفصیلات سامنے آگئیں
لندن: سابق وزیر اعظم اور تحریک انصاف کے بانی چیئرمین عمران خان نے گزشتہ سال نومبر میں اڈیالہ جیل میں ایک اہم امریکی پاکستانی شخصیت سے طویل ملاقات کی تھی، جو اب پاکستان کے اعلیٰ حکام سے جاری اہم بات چیت میں شامل ہیں۔ یہ انکشاف معتبر ذرائع نے کیا ہے جن کے مطابق یہ بات چیت عمران خان کی رہائی اور طاقتور حلقوں کے ساتھ تعلقات بہتر بنانے کی ممکنہ راہوں پر مشتمل تھی۔
ملاقاتوں کا پس منظر اور کرداروں کی شمولیت
دی نیوز کے مطابق مارچ 2025 کے تیسرے ہفتے میں امریکی پاکستانیوں کے ایک وفد نے عمران خان سے ملاقات کی، لیکن اس سے قبل کئی سیشنز پر مبنی بات چیت گزشتہ سال نومبر میں ہی ہو چکی تھی۔ ذرائع کے مطابق ان مذاکرات کا مقصد عمران خان اور اسٹیبلشمنٹ کے درمیان جاری تعطل کو ختم کرنا تھا۔
مذاکرات میں شامل اہم شخصیات
ان کوششوں میں امریکہ سے تعلق رکھنے والے معروف فوڈ اور رئیل اسٹیٹ بزنس مین تنویر احمد، تحریک انصاف امریکا چیپٹر کے سینئر رہنما عاطف خان، سردار عبدالسمیع، ڈاکٹر عثمان ملک، ڈاکٹر سائرہ بلال اور ڈاکٹر محمد منیر شامل ہیں۔
عمران خان کے پرانے تعلقات اور معاونت
ملاقات کرنے والے افراد میں وہ شخصیات شامل تھیں جو گزشتہ دو دہائیوں سے عمران خان کے ذاتی دوست اور مالی معاون رہے ہیں۔ جب عمران خان وزیراعظم تھے تب بھی یہ لوگ ان سے ملاقاتیں کرتے رہے، اور امریکہ سے پاکستان آنے والے وفود کو منظم کرنے میں بھی اہم کردار ادا کرتے رہے ہیں۔
ملاقاتوں کے دوران گفتگو اور مفاہمت کی پیش رفت
ذرائع کے مطابق نومبر 2024 کی ملاقاتوں میں عمران خان نے اسٹیبلشمنٹ اور حکومت کے ساتھ مفاہمت کی ضرورت کو سمجھا اور معاملات کو حل کرنے کی خواہش کا اظہار بھی کیا۔ انہیں یقین دہانی کرائی گئی کہ ایک بڑے عوامی مارچ کے ذریعے حکومت پر دباؤ ڈالا جائے گا تاکہ فیصلہ کن مذاکرات کی راہ ہموار ہو۔
لانگ مارچ اور خیبر پختونخواہ کی قیادت کا کردار
خیبر پختونخوا کے تین اہم رہنماؤں نے عمران خان کو یقین دلایا کہ لاکھوں افراد اسلام آباد کی طرف مارچ کریں گے، اور اس عوامی دباؤ سے عمران خان کو ان کی شرائط پر رہا کرایا جائے گا۔
بشریٰ بی بی کی غیر شمولیت
ذرائع نے یہ بھی انکشاف کیا کہ اس وقت بشریٰ بی بی ان مذاکرات یا کسی بھی حکمت عملی کا حصہ نہیں تھیں، اور ان کی شمولیت کے حوالے سے کوئی فیصلہ نہیں لیا گیا تھا۔
امریکی پاکستانیوں سے مذاکرات کی معطلی
عمران خان لانگ مارچ کی کامیابی کے حوالے سے اس قدر پُرامید تھے کہ انہوں نے امریکی پاکستانیوں کے ساتھ بات چیت کو معطل کرنے کا فیصلہ کیا تاکہ تمام تر توجہ عوامی تحریک پر مرکوز رکھی جا سکے۔
یہ بھی پڑھیں:اے ٹی سی کا علیمہ خان کی درخواست پر بڑا فیصلہ، عمران خان سے ملاقات کی اجازت مل گئی