خواجہ آصف نے عوام کو بجٹ میں مزید خوشخبریوں کی نوید سنادی
سیالکوٹ میں کارکنوں سے خطاب
وزیر دفاع خواجہ آصف نے سیالکوٹ میں مسلم لیگ (ن) کے کارکنوں سے خطاب کرتے ہوئے کہا کہ ملک کی حالت کھنڈر جیسی تھی، ہم نے تباہ حال بنیادوں پر نئی عمارت کھڑی کرنے کی کوشش کی۔ انہوں نے کہا کہ شہباز شریف کبھی آئی ایم ایف، کبھی چین اور کبھی سعودی عرب کے در پر دستک دے رہے تھے تاکہ ملک دیوالیہ نہ ہو۔
آنے والے بجٹ میں ریلیف کی نوید
خواجہ آصف کا کہنا تھا کہ آنے والے بجٹ میں عوام کو مزید خوشخبریاں ملیں گی، جس کا براہِ راست فائدہ غریب اور متوسط طبقے کو ہوگا۔ انہوں نے دعویٰ کیا کہ اب بجلی سستی ہو رہی ہے، جو ماضی قریب میں کوئی سوچ بھی نہیں سکتا تھا۔
پی ٹی آئی پر شدید تنقید
خواجہ آصف نے پی ٹی آئی پر تنقید کرتے ہوئے کہا کہ اب وہ خود ایک دوسرے کو چور کہہ رہے ہیں۔ ان کا لیڈر بھی سند یافتہ چور ہے، جبکہ بیرون ملک موجود پی ٹی آئی کے کچھ عناصر ملک دشمن سرگرمیوں میں ملوث ہیں۔
پی ڈی ایم کی کوششوں کو سراہا
انہوں نے کہا کہ ملک جس نہج پر کھڑا تھا، وہ مکمل تباہی کا منظر پیش کر رہا تھا لیکن پی ڈی ایم میں شامل تمام جماعتوں نے مل کر عوام کو امید کی کرن دکھائی ہے۔
مریم نواز کی قیادت پر اعتماد
وزیر دفاع نے کہا کہ مریم نواز پنجاب کو ترقی کی راہ پر ڈال رہی ہیں، اور جب بھی نواز شریف، مریم نواز یا شہباز شریف حکومت میں آتے ہیں تو ترقی کا سفر تیز ہوتا ہے۔
دہشتگردی اور فوج کی قربانیاں
خواجہ آصف نے دہشتگردی پر بات کرتے ہوئے کہا کہ ہمارے فوجی جوان روزانہ شہید ہو رہے ہیں، عید کے دن بھی فوجی جوان سرحدوں پر پہرہ دے رہے تھے۔
پی ٹی آئی قیادت کو جیل میں مراعات کی شکایت
انہوں نے بانی پی ٹی آئی پر تنقید کرتے ہوئے کہا کہ انہیں جیل میں ہر طرح کی سہولیات میسر ہیں، حتیٰ کہ دیسی مرغ اور کشتے بھی دیے جا رہے ہیں، جبکہ ہم جیلوں میں فرش پر سوتے تھے۔
اوورسیز پاکستانیوں کی حمایت
خواجہ آصف نے کہا کہ پی ٹی آئی اوورسیز پاکستانیوں سے رقوم نہ بھیجنے کا کہتی رہی، لیکن بیرون ملک پاکستانیوں نے زیادہ رقوم بھیج کر حب الوطنی کا ثبوت دیا۔
یہ بھی پڑھیں:جسٹس کارنیلس پاکستان کے بے داغ اور غیر متنازعہ چیف جسٹس