عید کے تیسرے دن لاہور کا پارہ 46 ڈگری پر پہنچ گیا
محکمہ موسمیات کے مطابق لاہور میں 9 جون، جو کہ عید الاضحیٰ کا تیسرا دن تھا، 18 سال بعد سب سے گرم دن ثابت ہوا۔ اس روز زیادہ سے زیادہ درجہ حرارت 46 ڈگری سینٹی گریڈ ریکارڈ کیا گیا، جو گزشتہ دہائیوں کی شدید ترین گرمی میں سے ایک ہے۔
2007 کے بعد سب سے بلند درجہ حرارت
محکمہ موسمیات کا کہنا ہے کہ اس سے قبل 2007 میں لاہور ایئرپورٹ پر درجہ حرارت 48 ڈگری سینٹی گریڈ تک پہنچا تھا۔ حالیہ درجہ حرارت اس کے بعد دوسرا بلند ترین ہے، جس نے شہریوں کو شدید گرمی کا سامنا کرنے پر مجبور کیا۔
گرمی کی شدت میں غیر معمولی اضافہ
لاہور میں درجہ حرارت اگرچہ 46 ڈگری ریکارڈ کیا گیا، مگر محسوس ہونے والی گرمی 47 ڈگری سے بھی زیادہ تھی۔ ماہرین موسمیات کا کہنا ہے کہ ہوا میں نمی کے تناسب اور ہوا کی رفتار کی وجہ سے گرمی کی شدت کئی گنا زیادہ محسوس کی گئی۔
دیگر شہروں میں بھی شدید گرمی کی لہر
ملک بھر میں بھی گرمی کی شدید لہر جاری ہے۔ اسلام آباد اور پشاور میں درجہ حرارت 44 ڈگری، کوئٹہ میں 36 اور کراچی میں 34 ڈگری سینٹی گریڈ رہنے کی پیشگوئی کی گئی ہے۔ دوسری جانب ڈی جی خان اور جیکب آباد میں سب سے زیادہ 49 ڈگری، سرگودھا اور سبی میں 48 ڈگری، جبکہ گوجرانوالہ، جہلم، قصور اور منڈی بہاءالدین میں 47 ڈگری سینٹی گریڈ ریکارڈ کیا گیا۔
ماہرین کی احتیاطی تدابیر کی اپیل
حکمہ موسمیات اور ماہرین صحت نے شہریوں کو ہدایت کی ہے کہ غیر ضروری طور پر دھوپ میں نہ نکلیں، پانی کا زیادہ استعمال کریں، اور گرمی سے بچاؤ کے اقدامات ضرور اختیار کریں۔
یہ بھی پڑھیں:عیدالاضحیٰ کے دوران موسم کیسا رہے گا؟