شبِ قدر، جو رمضان المبارک کے آخری عشرے کی طاق راتوں میں پوشیدہ ہے، ایک عظیم اور برکتوں والی رات ہے۔ قرآن کریم اسی رات لوحِ محفوظ سے آسمانِ دنیا پر نازل کیا گیا۔ نبی کریم ﷺ نے امت کو تاکید فرمائی کہ وہ اس رات کو 21، 23، 25، 27 یا 29ویں رات میں تلاش کرے۔
حضرت عائشہ رضی اللہ عنہا سے روایت ہے کہ رسول اللہ ﷺ نے فرمایا: ’’شبِ قدر کو رمضان کے آخری عشرے کی طاق راتوں میں تلاش کرو۔‘‘ (صحیح بخاری)
یہ رات ہزار مہینوں سے بہتر ہے، اور اس میں کی جانے والی عبادات کا اجر بے حد عظیم ہے۔ حضرت عائشہ رضی اللہ عنہا بیان فرماتی ہیں کہ نبی کریم ﷺ نے اس رات کو خصوصی عبادات میں گزارا اور اپنی امت کو بھی اس کی فضیلت سے آگاہ کیا۔ جب حضرت عائشہ رضی اللہ عنہا نے دریافت کیا کہ اگر کوئی شبِ قدر کو پالے تو وہ کیا دعا کرے، تو نبی کریم ﷺ نے یہ دعا پڑھنے کی تلقین فرمائی:
اللَّهُمَّ إِنَّكَ عَفُوٌّ تُحِبُّ العَفْوَ فَاعْفُ عَنِّي (ترمذی)
شبِ قدر (27 رمضان) کی نوافل اور عبادات
یہ رات ہزار مہینوں سے بہتر ہے، اس لیے اس میں زیادہ سے زیادہ عبادت کرنی چاہیے۔ درج ذیل نوافل پڑھنا بہت فضیلت رکھتا ہے:
1) بارہ رکعت نفل (چار چار رکعت کرکے)
ہر رکعت میں سورہ فاتحہ کے بعد سورہ قدر ایک بار اور سورہ اخلاص 15 بار پڑھیں۔
بعد از نماز 70 بار استغفار کریں۔
فضیلت: انبیاء کرام کی عبادت کے برابر ثواب ملے گا۔
2) دو رکعت نفل
ہر رکعت میں سورہ فاتحہ کے بعد سورہ قدر 3 بار اور سورہ اخلاص 27 بار پڑھیں۔
فضیلت: سابقہ تمام گناہ معاف ہو جائیں گے۔
3) چار رکعت نفل (دو دو رکعت کرکے)
ہر رکعت میں سورہ فاتحہ کے بعد سورہ قدر ایک بار اور سورہ اخلاص 3 بار پڑھیں۔
بعد از نماز 70 بار درود شریف پڑھیں۔
فضیلت: اللہ کی خاص رحمت نصیب ہوگی۔
4) سورہ ملک سات مرتبہ پڑھنا
فضیلت: قبر کے عذاب سے حفاظت ہوگی۔
5) صلاۃ التسبیح
یہ نماز چار رکعت ہوتی ہے اور اس میں 300 بار تسبیحات پڑھی جاتی ہیں۔
فضیلت: تمام گناہوں کی مغفرت ہو جاتی ہے۔
6) سورہ واقعہ سات مرتبہ پڑھنا
فضیلت: رزق میں برکت کے لیے بہت مؤثر ہے۔
7) قرآن پاک کی تلاوت اور استغفار
اس رات میں زیادہ سے زیادہ قرآن کی تلاوت کرنی چاہیے۔
100 بار استغفار اور 100 بار درود شریف پڑھنا افضل ہے۔
یہ نوافل اور عبادات شبِ قدر میں زیادہ سے زیادہ کرنے کی کوشش کریں تاکہ اللہ کی رحمت، مغفرت اور برکتیں حاصل ہو سکیں
29ویں شب
- چار رکعت نفل (دو دو رکعت کرکے) ہر رکعت میں سورہ فاتحہ کے بعد سورہ قدر ایک بار اور سورہ اخلاص تین بار پڑھیں۔
- بعد از نماز 70 بار سورہ الم نشرح پڑھیں۔
- سورہ واقعہ سات مرتبہ پڑھیں۔