میچل اسٹارک نے آئی پی ایل کیلئے بھارت واپس جانے سے انکار کردیا

سیکیورٹی خدشات پر انکار

آسٹریلوی فاسٹ بولر میچل اسٹارک نے انڈین پریمیئر لیگ (آئی پی ایل) کے بقیہ میچز کھیلنے کے لیے بھارت واپس جانے سے انکار کر دیا ہے۔ آسٹریلوی میڈیا کے مطابق اسٹارک نے فرنچائز دہلی کیپیٹلز کو اپنے فیصلے سے آگاہ کر دیا ہے اور اس فیصلے کی وجہ خطے میں سیکیورٹی کی صورتحال بتائی گئی ہے۔

دھرم شالا واقعے کا اثر

میچل اسٹارک ان کھلاڑیوں میں شامل تھے جو دھرم شالا میں پیش آئے بلیک آؤٹ کے دوران میدان میں موجود تھے۔ ان کی اہلیہ ایلیسا ہیلی بھی اس وقت موجود تھیں اور انہوں نے ایک انٹرویو میں وہاں کی صورتحال کو تفصیل سے بیان کیا تھا، جس سے اسٹارک کے فیصلے پر اثر پڑا۔

دیگر آسٹریلوی کھلاڑیوں کی صورتحال

میڈیا رپورٹس کے مطابق آسٹریلوی بولر جوش ہیزل ووڈ کندھے کی تکلیف کے باوجود انڈیا واپس جا رہے ہیں اور رائل چیلنجر بنگلور کو پلے آف سے قبل جوائن کریں گے۔ آسٹریلوی کپتان پیٹ کمنز اور بیٹر ٹریوس ہیڈ بھی انڈیا میں اپنی ٹیموں کو جوائن کرنے والے ہیں۔ کرکٹ آسٹریلیا جلد اس حوالے سے باقاعدہ اعلان کرے گا۔

آئی پی ایل کی بحالی

واضح رہے کہ آئی پی ایل کو گزشتہ جمعے کو ایک ہفتے کے لیے ملتوی کیا گیا تھا، تاہم لیگ 17 مئی سے دوبارہ شروع ہو رہی ہے۔ بی سی سی آئی پر سیکیورٹی انتظامات کے حوالے سے دباؤ بڑھ رہا ہے، خاص طور پر غیر ملکی کھلاڑیوں کی جانب سے۔

یہ بھی پڑھیں:پی ایس ایل کے بقیہ میچز مئی کے تیسرے ہفتے میں کروانے پر اتفاق