مجھ میں اور شہباز میں کوئی فرق نہیں، وزیراعظم کو ئی بھی ہو فرق نہیں پڑتا ہم ایک ہیں: نواز شریف

ایران کے ساتھ تعلقات پر مؤقف

مسلم لیگ (ن) کے صدر اور سابق وزیراعظم نواز شریف نے کہا ہے کہ ایران کے معاملے پر حکومت کا مؤقف حق پر مبنی ہے کیونکہ ایران کے خلاف جارحیت کی جا رہی ہے۔ انہوں نے واضح کیا کہ ایران کے ساتھ پاکستان کے مذہبی، ہمسائیگی اور ثقافتی رشتے موجود ہیں جنہیں نظرانداز نہیں کیا جا سکتا۔

حکومتی کارکردگی اور دفاعی مؤقف

لندن میں اپنے اعزاز میں دیے گئے ظہرانے سے خطاب کرتے ہوئے نواز شریف نے کہا کہ موجودہ حکومت نہ صرف اندرون ملک بلکہ عالمی سطح پر بھی بہترین انداز میں کام کر رہی ہے۔ انہوں نے مزید کہا کہ پاکستان نے بھارت کی جارحیت کے خلاف ہمیشہ بھرپور دفاع کیا ہے اور ہماری فوجی صلاحیتیں صرف دفاع کے لیے ہیں، کسی جارحیت کے لیے نہیں۔

سیاسی اتحاد اور اوورسیز کارکنوں کو سراہا

نواز شریف کا کہنا تھا کہ ان میں اور وزیراعظم شہباز شریف میں کوئی فرق نہیں اور وہ ایک ہی ہیں۔ انہوں نے پارٹی کے اوورسیز کارکنوں کو اثاثہ قرار دیتے ہوئے موجودہ چیلنجز سے نمٹنے کے لیے تمام پارٹی کارکنوں کو متحد ہو کر کام کرنے کی تلقین کی۔

پاکستان واپسی کا اعلان

ذرائع کے مطابق نواز شریف برطانیہ کا دورہ مکمل کرکے کل پاکستان واپس روانہ ہوں گے۔

یہ بھی پڑھیں:سرکاری ملازمین کی تنخواہوں میں 10 فیصد اضافے کی منظوری دے دی گئی