2025 کیلئے دنیا کے بہترین ائیرپورٹ کا اعزاز ایک ایشیائی ملک کے نام
سنگاپور کا چانگی ائیرپورٹ ایک بار پھر دنیا کا بہترین ہوائی اڈہ قرار
روزانہ کروڑوں مسافر فضائی سفر کے دوران ائیرپورٹس پر قیام کرتے ہیں، لیکن کچھ ہوائی اڈے اپنے دلکش ماحول، جدید سہولیات اور بہترین خدمات کے باعث ان کے دل میں جگہ بنا لیتے ہیں۔ ایسے ہی ایک ائیرپورٹ نے 2025 میں دنیا کے بہترین ائیرپورٹ کا اعزاز حاصل کر لیا ہے۔
قطر اور سنگاپور کے درمیان بہترین ائیرپورٹ کی دوڑ
اسکائی ٹریکس (Skytrax) ایئرلائن کنسلٹنگ گروپ کی جانب سے 2025 کے لیے جاری کی گئی فہرست کے مطابق، سنگاپور کے چانگی ائیرپورٹ (Changi Airport) نے ایک بار پھر پہلا مقام حاصل کیا ہے، جبکہ قطر کے حماد انٹرنیشنل ائیرپورٹ کو دوسرا درجہ دیا گیا ہے۔ گزشتہ برس حماد انٹرنیشنل ائیرپورٹ سرفہرست تھا۔
چانگی ائیرپورٹ کی خوبصورتی اور سہولیات
چانگی ائیرپورٹ کا شمار ان چند ہوائی اڈوں میں ہوتا ہے جہاں مسافر گھنٹوں قیام کے باوجود بور نہیں ہوتے۔ اس ائیرپورٹ میں آبشار، شیشے کا پل، اسپاز، ہوٹلز، آرٹ گیلریز، میوزیم، سینما اور ڈائناسور تھیم پارک جیسی سہولیات موجود ہیں، جو اسے دنیا کے منفرد ائیرپورٹس میں شامل کرتی ہیں۔
دنیا کے 565 ہوائی اڈوں میں مقابلہ
اس سال کی فہرست دنیا بھر کے 565 ہوائی اڈوں میں دستیاب سہولیات، صفائی، وائی فائی، ریسٹورانٹس، ٹرمینل لے آؤٹ سمیت دیگر پہلوؤں پر مبنی عوامی رائے کی بنیاد پر ترتیب دی گئی ہے۔ چانگی ائیرپورٹ نے مجموعی طور پر 13 ویں بار یہ اعزاز اپنے نام کیا ہے۔
دیگر ٹاپ 10 ائیرپورٹس
جاپان کا ٹوکیو ہینیڈا ائیرپورٹ تیسرے نمبر پر رہا، جسے دنیا کا سب سے صاف ستھرا ائیرپورٹ بھی قرار دیا گیا۔ جنوبی کوریا کا انچیون ائیرپورٹ چوتھے، جاپان کا ناریتا پانچویں، ہانگ کانگ کا انٹرنیشنل ائیرپورٹ چھٹے، پیرس کا چارلس ڈیگال ساتویں، روم کا فلومیچینو آٹھویں، جرمنی کا میونخ نواں جبکہ سوئٹزرلینڈ کا زیورخ ائیرپورٹ دسویں نمبر پر رہا۔
انٹرنیشنل معیار اور سیاحت کا مرکز
سنگاپور کا چانگی ائیرپورٹ نہ صرف فضائی سفر کے لیے ایک مثالی مقام ہے بلکہ یہ سیاحوں کے لیے بھی پرکشش جگہ بن چکا ہے۔ یہی وجہ ہے کہ ایک بار پھر یہ ہوائی اڈہ دنیا کا نمبر ون ائیرپورٹ بننے میں کامیاب رہا ہے۔
یہ بھی پڑھیں:پاکستان میں سالانہ 3.5 کروڑ ایکڑ فٹ بارش کا پانی ضائع ہونے کا انکشاف