پاکستان نے آپریشن بُنْيَانٌ مَّرْصُوْص میں تاریخی کامیابی کے بعد 16 مئی 2025ء کو قومی سطح پر یوم تشکر منانے کا اعلان کر دیا ہے۔ یہ دن افواج پاکستان اور پاکستانی عوام کی جرات و قربانی کو خراج تحسین پیش کرنے کے لیے مخصوص کیا گیا ہے۔
قرآن خوانی، دعائیں اور سلامی کی تقریبات
یوم تشکر کے موقع پر دن کا آغاز ملک بھر کی مساجد میں قرآن خوانی اور خصوصی دعاؤں سے ہوگا۔ اسلام آباد میں 31 اور چاروں صوبائی دارالحکومتوں میں 21 توپوں کی سلامی دی جائے گی، تاکہ فتح کے اس دن کو قومی سطح پر یادگار بنایا جا سکے۔
قومی یادگاروں پر تقریبات
مزار قائد کراچی اور مزار اقبال لاہور پر گارڈز کی تبدیلی کی روایتی اور پروقار تقریب منعقد ہوگی، جبکہ وفاقی اور صوبائی دارالحکومتوں میں پرچم کشائی کی تقریبات بھی ہوں گی۔
شہداء کی قربانیوں کو خراج عقیدت
ملک بھر میں یادگار شہداء پر پھول چڑھائے جائیں گے، دعائیہ تقاریب منعقد ہوں گی اور آپریشن بنیان مرصوص کے شہداء کے اہلخانہ سے خصوصی ملاقاتیں کی جائیں گی تاکہ ان کی قربانیوں کو زندہ رکھا جا سکے۔
مرکزی تقریب اسلام آباد میں
یوم تشکر کی مرکزی اور خصوصی تقریب 15 مئی کی رات پاکستان مونومنٹ اسلام آباد میں ہوگی، جہاں وزیراعظم پاکستان مہمان خصوصی ہوں گے۔ اس تقریب میں چیئرمین جوائنٹ چیفس آف اسٹاف کمیٹی، تینوں مسلح افواج کے سربراہان اور مختلف شعبہ ہائے زندگی سے تعلق رکھنے والی ممتاز شخصیات شرکت کریں گی۔
یہ بھی پڑھیں:مریم نواز کا آپریشن بنیان المرصوص پر فخر: یہ تاریخ میں سنہری حروف سے لکھا جائے گا