فیلڈمارشل کے عہدے سے کیا مرادہے؟کس جنرل کو فیلڈمارشل کا عہدہ ملتاہے؟

فوج کا سب سے اعلیٰ رینک

فیلڈ مارشل (Field Marshal) بری فوج میں جنرل کے بعد سب سے بڑا اور اعلیٰ ترین فوجی عہدہ ہوتا ہے، جسے دنیا بھر میں بہت کم افسران کو عطا کیا جاتا ہے۔ یہ عہدہ عموماً اعزازی حیثیت رکھتا ہے اور جنگوں یا قومی دفاع میں غیر معمولی خدمات انجام دینے والے سینیئر ترین جنرلز کو دیا جاتا ہے۔

پاکستان میں فیلڈ مارشل کی حیثیت

پاکستان میں آج تک صرف دو افسران کو فیلڈ مارشل کے عہدے پر فائز کیا گیا ہے۔ پہلے فیلڈ مارشل جنرل محمد ایوب خان تھے جنہیں 1959 میں یہ اعزاز دیا گیا۔ اب حال ہی میں وفاقی حکومت نے آرمی چیف جنرل عاصم منیر کو فیلڈ مارشل کے عہدے پر ترقی دی ہے، جو اس تاریخی رینک کے حامل دوسرے پاکستانی فوجی بن گئے ہیں۔

فیلڈ مارشل کے اختیارات اور علامتی حیثیت

فیلڈ مارشل کا عہدہ عملی کمان کے بجائے ایک اعزازی اور علامتی حیثیت رکھتا ہے۔ یہ عہدہ دینے کا مقصد فوج میں خدمات کی غیر معمولی قدر اور قومی سطح پر اعلیٰ اعزاز دینا ہوتا ہے۔ فیلڈ مارشل کا درجہ “فائیو اسٹار جنرل” کے طور پر بھی جانا جاتا ہے، یعنی یہ رینک پانچ ستاروں پر مشتمل ہوتا ہے، جو اسے دیگر تمام فوجی رینکس سے منفرد بناتا ہے۔

بین الاقوامی پس منظر

دنیا کے کئی ممالک میں بھی یہ رینک موجود ہے جیسے برطانیہ، بھارت اور مصر، مگر بہت محدود شخصیات کو ہی اس اعلیٰ ترین عہدے پر فائز کیا گیا ہے۔ پاکستان میں فیلڈ مارشل کا اعزاز ایک نایاب اعزاز سمجھا جاتا ہے۔