عمرہ زائرین کے لیے بڑی سہولت، مسجد الحرام اور مسجد نبوی میں ہجوم کی صورتحال اب موبائل پر لائیو دیکھی جا سکے گی

مکہ مکرمہ: عمرہ کی ادائیگی کے لیے جانے والوں کو اب یہ اندازہ لگانے کی ضرورت نہیں رہے گی کہ مسجد الحرام میں اس وقت رش کتنا ہے۔ سعودی عرب نے نئی ڈیجیٹل خدمات متعارف کرا دی ہیں جن کے ذریعے زائرین اپنے موبائل فون پر طواف اور سعی کے علاقوں میں ہجوم کی صورتحال لائیو دیکھ سکیں گے اور عبادت کے لیے نسبتاً کم رش والا وقت خود چن سکیں گے۔

طواف اور سعی کا رش پہلے سے معلوم ہوگا

اس سہولت میں خانہ کعبہ کے گرد مطاف اور صفا و مروہ کے درمیان سعی کے راستے کے لیے ہجوم کے اشارے لمحہ بہ لمحہ اپ ڈیٹ ہوں گے۔ زائر مسجد پہنچنے سے پہلے ہی دیکھ لے گا کہ کس حصے میں رش زیادہ ہے اور کس میں کم، یوں ضعیف العمر افراد اور خاندانوں کے لیے عبادت کا وقت طے کرنا کہیں آسان ہو جائے گا۔ یہی سہولت مدینہ منورہ کی مسجد نبوی میں بھی دستیاب ہے۔

950 مقامات اور ایک لاکھ سے زائد راستوں کا نقشہ

دونوں مقدس مساجد کا انٹرایکٹو ڈیجیٹل نقشہ بھی اس نظام کا حصہ ہے جس میں تقریباً 950 اہم مقامات اور نشانیاں شامل ہیں۔ مسجد الحرام میں خانہ کعبہ، مقام ابراہیم، صفا اور مروہ جبکہ مسجد نبوی میں روضہ رسول، حجرة النبویہ، محراب اور منبر سمیت نمایاں مقامات اس نقشے میں تلاش کیے جا سکیں گے۔ پلیٹ فارم پر 17 سے زائد زمروں میں ایک لاکھ سے زیادہ ممکنہ راستے دیے گئے ہیں اور 650 سے زائد کیو آر کوڈز کے ذریعے کسی بھی مقام کی معلومات فوری حاصل کی جا سکیں گی۔ دونوں مساجد میں نصب چھ سے زائد ڈیجیٹل اسکرینیں بھی اسی نظام سے جڑی ہیں جبکہ خصوصی ضروریات کے حامل زائرین کے لیے قابل رسائی مقامات اور آسان راستے الگ سے دکھائے جائیں گے۔ سعودی حکام کا کہنا ہے کہ اس اقدام کا مقصد زائرین کی نقل و حرکت بہتر بنانا اور ان کا وقت ضائع ہونے سے بچانا ہے۔