عالمی یوم پولیو: آصفہ بھٹو زرداری کا پولیو فری پاکستان کے عزم کا اعادہ

اسلام آباد: خاتون اول آصفہ بھٹو زرداری نے عالمی یوم پولیو کے موقع پر پولیو فری پاکستان کے عزم کا اعادہ کیا ہے۔ جمعے کو جاری اپنے پیغام میں انہوں نے محاذ پر کام کرنے والی خواتین ویکسینیٹرز اور ان کی حفاظت پر مامور سکیورٹی اہلکاروں کو خراج تحسین پیش کیا۔
بینظیر بھٹو کی مہم کی یاد
آصفہ بھٹو نے یاد دلایا کہ ان کی والدہ، سابق وزیراعظم بینظیر بھٹو نے 1994 میں پاکستان میں پولیو کے خلاف پہلی قومی مہم کا آغاز کیا تھا — اور اس مہم کے پہلے قطرے انہیں (آصفہ کو) خود پلائے گئے تھے۔ انہوں نے کہا کہ یہ مشن اب بھی ادھورا ہے اور ہر بچے تک قطرے پہنچانا ہم سب کی ذمہ داری ہے۔ خاتون اول نے والدین سے اپیل کی کہ وہ پولیو ٹیموں کا دل سے استقبال کریں اور اپنے بچوں کو قطرے ضرور پلائیں۔
روٹری کی تین ارب ڈالر سے زائد معاونت
دوسری جانب روٹری انٹرنیشنل کے صدر اولاینکا حکیم بابالولا نے بھی پولیو کے خاتمے کے عزم کا اعادہ کیا۔ ان کے مطابق روٹری اب تک عالمی سطح پر پولیو کے خلاف تین ارب ڈالر سے زائد فراہم کر چکی ہے، جن میں پاکستانی اراکین کا حصہ 13 لاکھ ڈالر سے زیادہ ہے۔ انہوں نے کہا کہ روٹری کی معاونت سے دنیا بھر میں ساڑھے چار کروڑ سے زائد بچے محفوظ ہوئے، اور 2020 میں افریقہ کے پولیو فری قرار پانے سے ثابت ہوتا ہے کہ یہ مرض ختم کیا جا سکتا ہے۔
پاکستان میں پولیو کے کیسز اب بھی سامنے آ رہے ہیں، اس لیے ماہرین صحت کا کہنا ہے کہ قطرے پلانے کی مہم میں کسی بچے کو پیچھے نہیں چھوڑا جانا چاہیے۔