ایس آئی ایف سی کی معاونت سے تیل و گیس کے شعبے میں بڑی پیشرفت، سندھ و خیبرپختونخوا میں نئے ذخائر دریافت
اسپیشل انویسٹمنٹ فیسیلیٹیشن کونسل (ایس آئی ایف سی) کی رہنمائی سے پاکستان نے توانائی کے شعبے میں بڑی کامیابی حاصل کی ہے، جس سے معیشت کے استحکام اور توانائی کے بحران میں کمی کی امید پیدا ہو گئی ہے۔ سندھ اور خیبرپختونخوا میں تیل و گیس کے نئے ذخائر کی دریافت سے ملکی ذخائر میں نمایاں اضافہ متوقع ہے۔
سندھ میں تیل و گیس کی پیداوار بحال
او جی ڈی سی ایل (آئل اینڈ گیس ڈویلپمنٹ کمپنی لمیٹڈ) نے سندھ میں دریافت شدہ ایک کنویں سے پیداوار کی کامیاب بحالی کا اعلان کیا ہے۔ کمپنی کے مطابق اس کنویں سے یومیہ 115 بیرل خام تیل، 7 ملین مکعب فٹ گیس اور 21 میٹرک ٹن ایل پی جی حاصل کی جا رہی ہے۔ یہ پیشرفت بین الاقوامی معیار کے مطابق کی گئی کوششوں اور ایس آئی ایف سی کی موثر نگرانی کا نتیجہ ہے، جو توانائی کے شعبے میں قابل اعتماد سرمایہ کاری کی راہ ہموار کر رہی ہے۔
خیبرپختونخوا میں مسلسل تیسری بڑی دریافت
ماڑی انرجیز لمیٹڈ نے خیبرپختونخوا کے وزیرستان بلاک میں ہائیڈروکاربن کے نئے ذخائر دریافت کیے ہیں، جہاں سے 23.85 ملین مکعب فٹ یومیہ گیس اور 122 بیرل یومیہ کنڈینسیٹ گیس کی پیداوار شروع ہو چکی ہے۔ یہ ماڑی انرجیز کی خیبرپختونخوا میں مسلسل تیسری بڑی دریافت ہے، جو نہ صرف قومی پیداوار میں اضافہ کرے گی بلکہ مقامی سطح پر روزگار اور ترقی کے نئے مواقع بھی پیدا کرے گی۔
ملکی معیشت کے لیے امید کی کرن
ایس آئی ایف سی کی جانب سے نجی و سرکاری شعبے کو جوڑنے کی پالیسی کے تحت ان منصوبوں کی راہ ہموار ہوئی۔ ان کامیابیوں سے پاکستان کے تیزی سے کم ہوتے توانائی ذخائر میں اضافہ ہوگا اور درآمدی انحصار میں کمی آئے گی، جو زرمبادلہ کے ذخائر کو بھی بہتر کرے گا۔
یہ بھی پڑھیں:پاکستان میں تیل و گیس کے شعبے میں ترقی ذخائر میں اضافہ اور حکومتی اصلاحات