پی ایس ایل10: لاہور قلندرز کے سیم بلنگز نے عمر اکمل کا 9 سال پرانا ریکارڈ توڑ دیا
لاہور قلندرز کے سیم بلنگز نے پی ایس ایل کی تیز ترین نصف سنچری بنا کر نیا ریکارڈ قائم کر دیا
پاکستان سپر لیگ سیزن 10 میں لاہور قلندرز کے وکٹ کیپر بیٹر سیم بلنگز نے ایک نیا سنگ میل عبور کرتے ہوئے عمر اکمل کا 9 سال پرانا ریکارڈ توڑ دیا ہے۔ اتوار کے روز راولپنڈی کرکٹ اسٹیڈیم میں کھیلے گئے میچ میں لاہور قلندرز نے کوئٹہ گلیڈی ایٹرز کے خلاف بیٹنگ کرتے ہوئے 219 رنز کا بڑا ہدف دیا، جس میں سیم بلنگز نے صرف 19 گیندوں پر 50 رنز کی ناقابل شکست اننگ کھیل کر ٹیم کو مضبوط آغاز فراہم کیا۔
سیم بلنگز نے 4 چھکوں اور 4 چوکوں کی مدد سے یہ نصف سنچری مکمل کی جو پی ایس ایل میں لاہور قلندرز کی جانب سے سب سے تیز ففٹی ہے۔ اس سے قبل عمر اکمل نے 2016 میں پی ایس ایل کے پہلے سیزن میں 22 گیندوں پر ففٹی اسکور کی تھی جو اب سیم بلنگز نے پیچھے چھوڑ دی۔
اگرچہ پی ایس ایل کی تاریخ میں تیز ترین نصف سنچری کا مجموعی ریکارڈ 17 گیندوں پر ہے جو آصف علی اور رائلی روسو کے پاس ہے، تاہم لاہور قلندرز کے لیے سب سے تیز نصف سنچری اب سیم بلنگز کے نام ہو چکی ہے۔ اس میچ میں فخر زمان نے بھی شاندار بیٹنگ کرتے ہوئے 67 رنز کی اننگ کھیلی، جس میں 7 چوکے اور 3 چھکے شامل تھے۔
لاہور قلندرز نے 6 وکٹوں کے نقصان پر 219 رنز بنائے۔ جواب میں کوئٹہ گلیڈی ایٹرز کی ٹیم ہدف کے تعاقب میں صرف 140 رنز پر ڈھیر ہو گئی اور لاہور قلندرز نے یہ میچ 79 رنز سے جیت لیا۔ یہ پی ایس ایل 10 کے چوتھے میچ کا فیصلہ کن نتیجہ تھا، جس میں سیم بلنگز کی برق رفتار اننگ نے میچ کا رخ موڑ دیا۔
یہ بھی پڑھیں:پی ایس ایل 10 کے ٹکٹوں کی فروخت کا آغاز ہوگیا