عطا تارڑ کا ہنگامی بیان
وزیر اعظم کے معاون خصوصی عطا تارڑ نے ایک ہنگامی پریس کانفرنس میں انکشاف کیا ہے کہ بھارتی حکومت پاکستان پر اگلے 24 سے 36 گھنٹوں کے دوران کسی بھی وقت حملہ کر سکتی ہے۔ انہوں نے کہا کہ پاکستان کو مصدقہ انٹیلیجنس اطلاعات موصول ہوئی ہیں کہ بھارت داخلی سیاسی دباؤ سے توجہ ہٹانے کے لیے سرحدی خلاف ورزی یا فالس فلیگ آپریشن کی تیاری کر رہا ہے۔
پاکستان کی جوابی حکمت عملی واضح
عطا تارڑ نے واضح کیا کہ اگر بھارت نے کوئی غیر ذمہ دارانہ اقدام کیا تو پاکستان پوری طاقت کے ساتھ بھرپور اور فیصلہ کن جواب دے گا۔ انہوں نے کہا کہ پاکستان کی مسلح افواج کسی بھی جارحیت کے مقابلے کے لیے مکمل طور پر تیار اور چوکس ہیں، اور پاکستان کی سالمیت پر سمجھوتہ نہیں کیا جا سکتا۔
عالمی برادری کو آگاہ کر دیا گیا
حکومتی ترجمان کے مطابق یہ معاملہ اقوام متحدہ سمیت عالمی سفارتی سطح پر اٹھایا جا چکا ہے تاکہ دنیا کو بھارتی عزائم سے بروقت آگاہ کیا جا سکے۔ انہوں نے کہا کہ بھارت کے ماضی میں بھی ایسے ہتھکنڈے فالس فلیگ آپریشنز کے ذریعے استعمال کیے گئے ہیں تاکہ اپنے داخلی مسائل سے توجہ ہٹائی جا سکے۔
سیاسی تجزیہ کاروں کا ردعمل
دفاعی اور سیاسی تجزیہ کاروں کا کہنا ہے کہ بھارتی انتخابات کے پیش نظر مودی سرکار اپنی عوام کی توجہ مہنگائی، بے روزگاری اور معاشی بدحالی سے ہٹانے کے لیے سرحدی کشیدگی پیدا کر سکتی ہے۔ تاہم پاکستان کی جانب سے اس مرتبہ فوری اور براہ راست ردعمل کی پیش گوئی کی جا رہی ہے۔
قوم کو اتحاد کی تلقین
عطا تارڑ نے قوم سے اپیل کی کہ وہ افواہوں سے بچیں اور ریاستی بیانیے پر اعتماد رکھیں۔ انہوں نے کہا کہ مشکل وقت میں پوری قوم کو ایک پیج پر رہنے کی ضرورت ہے، اور پاکستان کسی بھی خطرے کا مؤثر انداز میں مقابلہ کرنے کی صلاحیت رکھتا ہے۔
یہ بھی پڑھیں:ہندوستان کیلئے بہتر ہوگا نیا پنگا نہ لے، اینٹ کا جواب پتھر سے دیں گے: اسحاق ڈار