پراپرٹی پر کیپیٹل گین ٹیکس کی شرح میں 25 فیصد تک اضافے کا امکان

کیپیٹل گین ٹیکس میں 25 فیصد اضافے کی تجویز

آئی ایم ایف کے دباؤ پر مالی سال 2025-26 کے بجٹ میں پراپرٹی پر کیپیٹل گین ٹیکس کی شرح بڑھانے کی تجویز سامنے آئی ہے۔ اس تجویز کے تحت پراپرٹی کی فروخت پر ٹیکس کی موجودہ شرح 15 فیصد سے بڑھا کر 40 فیصد کیے جانے کا امکان ہے، یعنی 25 فیصد کا ممکنہ اضافہ متوقع ہے۔ اس اقدام کا مقصد کارپوریٹ سیکٹر پر عائد انکم ٹیکس کے برابر شرح لاگو کرنا ہے۔

ریئل اسٹیٹ پر ٹیکس اصلاحات کی وجوہات

ذرائع کے مطابق حکومت کا مؤقف ہے کہ پراپرٹی کی خرید و فروخت پر لاکھوں روپے منافع حاصل کیا جاتا ہے لیکن اس پر نسبتا کم ٹیکس ادا کیا جاتا ہے، جس کی وجہ سے قومی خزانے کو خاطر خواہ نقصان ہو رہا ہے۔ یہی وجہ ہے کہ آئی ایم ایف نے اس شعبے پر ٹیکس اصلاحات پر زور دیا ہے تاکہ آمدنی میں اضافہ ہو اور بجٹ خسارے پر قابو پایا جا سکے۔

ٹیکس اصلاحات پر آئی ایم ایف سے مشاورت

وزارت خزانہ اور ایف بی آر نے آئی ایم ایف وفد کے ساتھ بجٹ تجاویز پر ورچوئل مذاکرات کا آغاز کر دیا ہے جو آج بھی جاری رہیں گے۔ ان مذاکرات میں آمدنی، اخراجات، ٹیکس وصولیوں اور ٹیکس ٹو جی ڈی پی جیسے اہداف پر بھی تبادلہ خیال کیا جا رہا ہے۔ ٹیکس ٹو جی ڈی پی کا ہدف 11 فیصد جبکہ بجٹ اخراجات جی ڈی پی کے 20.3 فیصد تک رکھنے کی تجویز دی گئی ہے۔

ٹرانزیکشنز میں کمی کا خدشہ

ماہرین نے خدشہ ظاہر کیا ہے کہ کیپیٹل گین ٹیکس میں اضافے کے بعد ریئل اسٹیٹ ٹرانزیکشنز میں واضح کمی آ سکتی ہے، کیونکہ خریدار و فروخت کنندہ دونوں ممکنہ طور پر بھاری ٹیکس سے بچنے کیلئے محتاط رویہ اختیار کریں گے۔ تاہم حکومت کا کہنا ہے کہ ٹیکس نظام کو منصفانہ اور موثر بنانے کے لیے یہ اقدامات ضروری ہیں۔

یہ بھی پڑھیں:آئی ایم ایف پاکستان کو 2 ارب ڈالر فراہم کرے گا، پاکستانی معیشت پر اظہارِ اطمینان