امریکی یومِ آزادی کی تقریب میں پاکستان کی قیادت کو سراہا گیا
اسلام آباد میں امریکا کے یومِ آزادی کی تقریب کے دوران امریکی ناظم الامور نیٹلی بیکر نے وزیرِاعظم شہباز شریف اور فیلڈ مارشل عاصم منیر کی قیادت کو ’’قابلِ تحسین‘‘ قرار دیا۔ انہوں نے تقریب میں شرکت کرنے پر وزیرِاعظم کا شکریہ بھی ادا کیا۔ نیٹلی بیکر کا کہنا تھا کہ پاکستان اور امریکا نے ہر مشکل وقت میں ایک دوسرے کا ساتھ دیا ہے۔
پاک-امریکہ تعاون کے شعبوں پر روشنی
نیٹلی بیکر نے اپنے خطاب میں کہا کہ پاکستان میں تعلیم، صحت، خوراک اور زراعت کے شعبوں میں امریکی تعاون ہمیشہ اہم رہا ہے۔ ان کا کہنا تھا کہ داعش کے حملہ آور کی حوالگی انسداد دہشت گردی میں ایک بڑی پیشرفت ہے، جو پاکستان کی قیادت کی مؤثر حکمت عملی کا ثبوت ہے۔
ڈیجیٹل معیشت میں پاکستان کا کردار قابلِ قدر
انہوں نے کہا کہ ڈیجیٹل معیشت اور اختراعی سرمایہ کاری میں پاکستان کا کردار نہایت متاثرکن ہے، اور امریکا ان شعبوں میں پاکستان کے ساتھ شراکت داری کو فروغ دیتا رہے گا۔ ان کا مزید کہنا تھا کہ پاک-امریکہ سکیورٹی تعاون طویل المدت شراکت داری کا ایک مضبوط ستون ہے۔
پاکستان کے قائدانہ کردار کی تعریف
نیٹلی بیکر نے کہا کہ امریکہ پاک-بھارت جنگ بندی میں اپنا مؤثر سفارتی کردار ادا کرتا رہا ہے، جبکہ یو ایس ایڈ نے پاکستان میں ترقیاتی منصوبوں کے ذریعے لاکھوں لوگوں کی زندگیاں بدلی ہیں۔ انہوں نے کرپٹو کرنسی اور ڈیجیٹل مارکیٹوں میں مشترکہ سرمایہ کاری پر بھی ذاتی خوشی کا اظہار کیا۔
ٹیکنالوجی اور اختراع میں مستقبل کی شراکت
امریکی ناظم الامور نے کہا کہ اختراع، ٹیکنالوجی اور ڈیجیٹل اسپیس میں نئی راہیں ہموار کرنے میں پاکستان کا قائدانہ کردار قابلِ تعریف ہے۔ انہوں نے کہا کہ پاک-امریکہ شراکت داری کا اگلا باب استحکام اور خوشحالی پر مبنی ہوگا، اور امریکہ پاکستان کو سرمایہ کاری، ٹیکنالوجی اور نئے مواقع فراہم کرتا رہے گا۔
یہ بھی پڑھیں:وزیراعظم شہباز شریف کا شمالی وزیرستان میں 14 دہشت گردوں کی ہلاکت پر سکیورٹی فورسز کو خراج تحسین