صنم چوہدری نے ڈرامہ انڈسٹری میں مشروط واپسی کا عندیہ دیدیا

واپسی کا امکان مگر شرط کے ساتھ

سابقہ پاکستانی اداکارہ اور موجودہ سوشل میڈیا انفلوئنسر صنم چوہدری نے ڈرامہ انڈسٹری میں واپسی کا عندیہ دیا ہے، لیکن ان کی واپسی مخصوص شرائط سے مشروط ہے۔ صنم چوہدری نے انسٹاگرام پر ایک سوال و جواب کے سیشن کے دوران اپنے مداحوں سے گفتگو کرتے ہوئے کہا کہ اگر ڈرامہ ایسا ہو جو ناظرین کو اللہ کے قریب کرے اور انہیں مکمل حجاب کے ساتھ اسلامی حدود میں کام کرنے کی اجازت ملے تو وہ ڈرامہ انڈسٹری میں واپسی پر غور کرسکتی ہیں۔

حجاب اور اسلامی تعلیمات کی ترجیح

صنم چوہدری نے چند برس قبل شوبز کو خیر باد کہہ کر روحانی سفر اختیار کیا تھا۔ وہ امریکا میں مقیم پاکستانی ہِپ ہَاپ گلوکار سومی چوہان سے شادی کرچکی ہیں۔ اب وہ اپنی سوشل میڈیا سرگرمیوں میں دین اسلام، قرآن پاک اور حجاب سے متعلق موضوعات پر بات کرتی ہیں اور ان کے انسٹاگرام پر 2.6 ملین سے زائد فالوورز ہیں۔

مقبول ڈراموں کا حصہ رہ چکی ہیں

اداکاری کے دور میں صنم چوہدری نے متعدد مشہور ڈراموں میں کام کیا، جن میں ’’گھر تتلی کا پر‘‘، ’’شیزا‘‘، ’’آسمان پہ لکھا‘‘، ’’میرا ابرو‘‘ اور ’’اب دیکھ خدا کیا کرتا ہے‘‘ شامل ہیں۔ ان کے ڈرامے ناظرین میں خاصے مقبول ہوئے اور ان کی اداکاری کو بھی سراہا گیا۔

 ایمان اور فن کا امتزاج ممکن؟

صنم چوہدری کی مشروط واپسی اس بات کی نشاندہی کرتی ہے کہ موجودہ دور میں شوبز انڈسٹری میں مذہبی اقدار کے ساتھ بھی کام کرنے کا تصور ممکن ہے، بشرطیکہ پروڈکشن ہاؤسز ان حدود کا احترام کریں۔

یہ بھی پڑھیں:اداکارہ اریج چوہدری کا خواتین کو اسلحہ رکھنے کا مشورہ، پاکستان کو غیر محفوظ قرار دے دیا