ایرانی پارلیمنٹ میں ارکان نے ‘پاکستان تشکر تشکر’ کے نعرے لگادیے
پاکستان سے اظہار تشکر
ایران کی پارلیمنٹ میں اس وقت منفرد منظر دیکھنے میں آیا جب ارکان نے پاکستان کے حق میں ’پاکستان تشکر تشکر‘ کے نعرے لگائے۔ یہ نعرے اس وقت بلند ہوئے جب ایرانی صدر ڈاکٹر مسعود پزشکیان نے اپنے خطاب میں اسرائیل کے خلاف حمایت کرنے پر پاکستان کی تعریف کی۔
پارلیمانی ردعمل اور شہداء کو خراج تحسین
پارلیمانی اجلاس میں اسپیکر محمد باقر قالیباف نے اسرائیلی حملوں کو بزدلانہ قرار دیتے ہوئے شہریوں پر حملوں کی شدید مذمت کی۔ ارکان نے ایرانی فوجی کمانڈرز، اہلکاروں اور جوہری سائنسدانوں کی قربانیوں کو سراہا اور خراج تحسین پیش کیا۔
پاکستانی قیادت کا ایران سے اظہار یکجہتی
اس سے قبل وزیراعظم شہباز شریف نے ایرانی صدر سے ٹیلی فونک رابطے میں اسرائیلی حملوں کو بین الاقوامی قوانین کی خلاف ورزی قرار دیا اور ایران کی حمایت میں کھڑے رہنے کا عزم دہرایا۔ انہوں نے کہا کہ ایران کو اقوام متحدہ کے چارٹر کے آرٹیکل 51 کے تحت اپنا دفاع کرنے کا مکمل حق حاصل ہے۔
اقوام متحدہ میں پاکستان کا مؤقف
پاکستان نے اسرائیلی جارحیت کے خلاف ایران کی حمایت میں اقوام متحدہ کی سلامتی کونسل میں بھی آواز اٹھائی۔ پاکستان کے مستقل مندوب عاصم افتخار نے اسرائیلی حملوں کو خطے میں امن و سلامتی کے لیے خطرہ قرار دیا اور کہا کہ اسرائیل کی مسلسل خلاف ورزیاں تشویشناک ہیں۔
