مون سون سسٹم کی آمد
محکمہ موسمیات نے تصدیق کی ہے کہ مون سون کی ہوائیں سندھ کے جنوبی علاقوں میں داخل ہو چکی ہیں، جس کے اثرات آئندہ چند دنوں میں مزید واضح ہوں گے۔ اس تبدیلی کے تحت 5 جولائی سے سندھ کے مختلف اضلاع میں گرج چمک کے ساتھ بارش متوقع ہے۔
کن اضلاع میں بارش کا امکان ہے؟
محکمہ موسمیات کے مطابق جمعرات کو تھرپارکر، عمرکوٹ، بدین، ٹھٹھہ، سجاول، جامشورو، ٹنڈو محمد خان، ٹنڈو الہیار، میرپورخاص اور حیدرآباد میں بارش کا امکان ہے۔ ان علاقوں میں کہیں کہیں موسلا دھار بارش اور ژالہ باری بھی ہوسکتی ہے۔
کراچی اور دیگر شہروں کی صورتحال
محکمہ موسمیات کے مطابق کراچی، سانگھڑ، شہید بینظیر آباد، دادو، سکھر اور خیرپور میں ہلکی بارش یا بوندا باندی متوقع ہے، جبکہ مطلع جزوی طور پر ابر آلود رہے گا۔ شہر میں درجہ حرارت میں کمی اور ہوا میں نمی کا تناسب بڑھنے کی توقع کی جا رہی ہے۔
ملک بھر میں بارش کا دوسرا سسٹم
محکمہ موسمیات نے مزید بتایا ہے کہ 5 سے 10 جولائی کے دوران ایک اور طاقتور مون سون سسٹم ملک کے مشرقی اور شمالی علاقوں کو متاثر کرے گا۔ اس سسٹم سے پنجاب، خیبرپختونخوا، گلگت بلتستان، کشمیر اور اسلام آباد میں موسلا دھار بارشوں کا امکان ہے۔
ممکنہ خطرات اور ہدایات
شدید بارشوں کے نتیجے میں ڈی جی خان، پشاور، نوشہرہ اور پوٹھوہار ریجن میں اربن فلڈنگ جبکہ پہاڑی علاقوں میں لینڈ سلائیڈنگ کا خطرہ ہے۔ متعلقہ اداروں کو الرٹ رہنے کی ہدایت دی گئی ہے تاکہ کسی بھی ہنگامی صورتحال سے نمٹا جا سکے۔
یہ بھی پڑھیں:کراچی میں رواں ماہ بارش کے 2 سے 3 اسپیل کی پیشگوئی