تنخواہوں میں اضافہ اور اطلاق کی تاریخ
وفاقی حکومت نے سرکاری ملازمین کو مالی سہولت فراہم کرتے ہوئے ان کی تنخواہوں میں 10 فیصد اضافے اور 30 فیصد ڈسپیریٹی الاؤنس دینے کا نوٹیفکیشن جاری کر دیا ہے۔ وزارت خزانہ کے مطابق اس اضافے کا اطلاق یکم جولائی 2025 سے کیا گیا ہے تاکہ نئے مالی سال کے آغاز سے ہی ملازمین کو ریلیف دیا جا سکے۔
ایڈہاک الاؤنس اور متاثرہ ملازمین کی تفصیل
نوٹیفکیشن کے مطابق 10 فیصد ایڈہاک الاؤنس موجودہ بنیادی تنخواہ پر لاگو کیا گیا ہے۔ اس کا اطلاق نہ صرف وفاقی سول ملازمین بلکہ مسلح افواج اور سول آرمڈ فورسز پر بھی ہوگا۔ یہ الاؤنس کنٹریکٹ ملازمین کو بھی دیا جائے گا، بشرطیکہ وہ اپنی تقرری کی شرائط کے تحت بنیادی تنخواہ حاصل کر رہے ہوں۔
ڈسپیریٹی الاؤنس کی منظوری اور بنیاد
وزارت خزانہ نے گریڈ 1 سے 22 تک کے تمام وفاقی ملازمین کو 30 جون 2022 کی بنیادی تنخواہ پر 30 فیصد ڈسپیریٹی الاؤنس دینے کی منظوری بھی دے دی ہے۔ یہ بھی یکم جولائی سے نافذ العمل ہوگا۔ اس کا مقصد تنخواہوں میں پائے جانے والے فرق کو کم کرنا اور یکساں سہولت فراہم کرنا ہے۔