راولپنڈی: آرمی چیف جنرل سید عاصم منیر پاکستان سپر لیگ (پی ایس ایل) کا میچ دیکھنے کے لیے راولپنڈی اسٹیڈیم پہنچے، جہاں کھلاڑیوں اور شائقین نے مسلح افواج کے ساتھ بھرپور یکجہتی کا اظہار کیا۔
پی ایس ایل کا راولپنڈی میں دوبارہ آغاز
پاکستان سپر لیگ سیزن 10 کا رنگا رنگ میلہ آج راولپنڈی میں دوبارہ سج گیا۔ میچ کے آغاز سے قبل اسٹیڈیم میں حب الوطنی کا بھرپور ماحول دیکھنے کو ملا، جہاں قومی ترانہ پڑھا گیا، اور شائقین “پاکستان زندہ باد” کے نعروں سے گونج اٹھے۔ اسٹیڈیم کو قومی پرچموں سے سجا دیا گیا، اور آتش بازی کا بھی شاندار مظاہرہ کیا گیا۔
شہدائے وطن کو خراجِ عقیدت
میچ کے آغاز سے قبل پاکستان کی بہادر مسلح افواج کو زبردست خراج تحسین پیش کیا گیا، جبکہ وطن کے شہداء کی عظیم قربانیوں کو یاد کرتے ہوئے ایک منٹ کی خاموشی اختیار کی گئی۔ کھلاڑیوں اور آفیشلز نے بھی مسلح افواج کے ساتھ اظہارِ یکجہتی کیا۔
آرمی چیف اور ڈی جی آئی ایس پی آر کی آمد
پہلی اننگز کے اختتام کے بعد تقریب دوبارہ شروع ہوئی جس میں آرمی چیف جنرل عاصم منیر اسٹیڈیم میں موجود تھے۔ ان کے ہمراہ ڈی جی آئی ایس پی آر لیفٹیننٹ جنرل احمد شریف چوہدری اور چیئرمین پی سی بی محسن نقوی بھی شریک تھے، جن کی آمد پر شائقین نے بھرپور استقبال کیا۔
پی ایس ایل کے دن افواجِ پاکستان کے نام
تقریب کے میزبان اداکار حمزہ علی عباسی نے اعلان کیا کہ پی ایس ایل کے تین دنوں کو مسلح افواج کے نام کیا گیا ہے۔ پہلا دن آرمی، دوسرا دن نیوی اور تیسرا دن ائیر فورس کے نام منایا جائے گا، جس کا مقصد افواج پاکستان کو خراج تحسین پیش کرنا ہے۔
یہ بھی پڑھیں: بھارتی فوج ہمیں ڈرا دھمکا نہیں سکتی، ملکی سالمیت کا دفاع کرنا جانتے ہیں: آرمی چیف