بلوچستان کے ضلع بولان میں دہشت گردوں کے حملے کے بعد سیکیورٹی فورسز نے کامیاب کارروائی کرتے ہوئے 80 یرغمال مسافروں کو بحفاظت آزاد کرا لیا ہے۔ اطلاعات کے مطابق رہائی پانے والوں میں 43 مرد، 26 خواتین اور 11 بچے شامل ہیں، جنہیں محفوظ مقام پر منتقل کر دیا گیا ہے۔ سیکیورٹی فورسز باقی یرغمالیوں کی بازیابی کے لیے بھرپور کوششیں جاری رکھے ہوئے ہیں اور دہشت گردوں کے گرد گھیرا مزید سخت کر دیا گیا ہے۔
آپریشن کے دوران فورسز نے 13 دہشت گردوں کو ہلاک کر دیا، جبکہ متعدد زخمی ہو گئے۔ سیکیورٹی ذرائع کا کہنا ہے کہ دہشت گرد چھوٹی ٹولیوں میں بٹ گئے ہیں، جن کے خلاف کارروائی جاری ہے۔ علاقے کو گھیرے میں لے لیا گیا ہے اور مزید نفری تعینات کر دی گئی ہے تاکہ باقی یرغمالیوں کی بحفاظت واپسی ممکن بنائی جا سکے۔
سیکیورٹی حکام کے مطابق، آخری دہشت گرد کے خاتمے تک آپریشن جاری رہے گا۔ عوام سے اپیل کی گئی ہے کہ وہ تعاون کریں تاکہ علاقے میں امن و امان بحال کیا جا سکے۔
حکام کے مطابق، یہ آپریشن اس وقت تک جاری رہے گا جب تک تمام یرغمالیوں کو بحفاظت آزاد نہیں کرایا جاتا اور دہشت گردوں کا مکمل خاتمہ یقینی نہیں بنا لیا جاتا۔ علاقے میں فورسز کی بھاری نفری تعینات ہے، جبکہ امدادی ٹیمیں بھی متاثرہ افراد کی مدد میں مصروف ہیں۔
یہ بھی پڑھیں: بولان میں جعفر ایکسپریس پر دہشت گردوں کا حملہ، متعدد جاں بحق