چین نے پاکستان پر بھارتی حملے پر سخت ردعمل دیتے ہوئے اسے افسوسناک اور خطے کے امن کے لیے تشویشناک قرار دیا ہے۔ چینی وزارت خارجہ نے واضح کیا ہے کہ بھارت اور پاکستان نہ صرف ایک دوسرے کے پڑوسی ہیں بلکہ چین کے بھی ہمسایہ ممالک ہیں، اس لیے کشیدگی میں اضافہ پورے خطے کو متاثر کر سکتا ہے۔
چینی ترجمان کا ردعمل
ترجمان چینی وزارت خارجہ نے بیجنگ میں میڈیا سے گفتگو کرتے ہوئے کہا کہ بھارت کی جانب سے آج صبح کی فوجی کارروائی کو چین افسوسناک سمجھتا ہے۔ ترجمان نے کہا کہ موجودہ صورتحال پر چین کو سخت تشویش ہے، اور چین فریقین پر زور دیتا ہے کہ وہ تحمل اور صبر و ضبط سے کام لیں۔
خطے میں امن کی ضرورت
ترجمان نے مزید کہا کہ بھارت اور پاکستان کو امن و استحکام کے وسیع تر مفاد میں اقدامات کرنے چاہئیں اور ایسے اقدامات سے گریز کرنا چاہیے جو صورتحال کو مزید پیچیدہ بنا سکتے ہیں۔ چین ہر قسم کی دہشت گردی کی مخالفت کرتا ہے لیکن ساتھ ہی طاقت کے استعمال کی بھی مخالفت کرتا ہے جو خطے میں کشیدگی بڑھانے کا باعث بنے۔
امن کی بحالی پر زور
چینی دفتر خارجہ نے زور دیا کہ دونوں ممالک باہمی تنازعات کو مذاکرات اور سفارتی ذرائع سے حل کریں تاکہ جنوبی ایشیا میں امن، ترقی اور استحکام کو یقینی بنایا جا سکے۔ چین نے عندیہ دیا کہ وہ علاقائی امن کے لیے اپنا کردار ادا کرنے کو تیار ہے۔
یہ بھی پڑھیں:بھارت کے بزدلانہ حملے میں پاک فوج کے لیفٹیننٹ کرنل کا 7 سالہ بیٹا شہید