بھارت کی دھمکی اور چین کا فوری ردعمل
23 اپریل 2025 کو پہلگام حملے کے بعد بھارت کی جانب سے سندھ طاس معاہدہ معطل کرنے اور پانی کو بطور ہتھیار استعمال کرنے کی دھمکی نے پاکستان میں آبی سلامتی کے خدشات بڑھا دیے ہیں۔ ان دھمکیوں کے ردعمل میں چین نے مہمند ڈیم کی تعمیراتی سرگرمیوں کو تیز کر دیا ہے اور اس منصوبے کو تزویراتی اہمیت دے دی ہے۔
مہمند ڈیم کی اہمیت اور پس منظر
خیبرپختونخوا کے ضلع مہمند میں واقع یہ ڈیم چین-پاکستان اقتصادی راہداری (CPEC) کے تحت جاری منصوبوں میں شامل ہے۔ مہمند ڈیم کو پاکستان کا فلیگ شپ ہائیڈرو پاور منصوبہ قرار دیا گیا ہے، جس پر کام 2019 میں شروع ہوا تھا۔ اس منصوبے کو پاکستان واپڈا کے تعاون سے چین انرجی انجینئرنگ کارپوریشن (CEEC) مکمل کر رہی ہے۔
تعمیراتی سرگرمیوں میں تیزی
بھارتی دباؤ کے پیش نظر چین نے اس ڈیم کی تعمیر میں تیزی لا کر پاکستان کے آبی تحفظ کو یقینی بنانے کا واضح پیغام دیا ہے۔ مہمند ڈیم نہ صرف بجلی کی پیداوار میں اہم کردار ادا کرے گا بلکہ پانی ذخیرہ کرنے اور زرعی زمینوں کو سیراب کرنے کے حوالے سے بھی کلیدی حیثیت رکھتا ہے۔
پاکستان کے لیے تزویراتی سنگ میل
مہمند ڈیم کی تیز رفتار تعمیر بھارت کی ممکنہ آبی جارحیت کے مقابلے میں پاکستان کے لیے دفاعی حکمت عملی کا حصہ بن چکی ہے۔ سی پیک کے تحت ہونے والا یہ منصوبہ نہ صرف اقتصادی ترقی بلکہ قومی سلامتی کے تناظر میں بھی انتہائی اہمیت اختیار کر گیا ہے۔
یہ بھی پڑھیں:بھارت کی پاکستان کیخلاف آبی جارحیت، بگلیہار کے بعد سلال ڈیم کے دروازے بھی بند کر دیے