تحائف نہ دینے پر بریک اپ، لڑکے نے سابق محبوبہ کے گھر سیکڑوں پارسل بھیج دیے
محبوبہ کے تحفے کے تقاضے اور عاشق کی انوکھے انداز میں بدلہ لینے کی کوشش
بھارتی ریاست مغربی بنگال میں ایک نوجوان نے اپنی سابق محبوبہ کو ہراساں کرنے کے لیے ایسا عجیب قدم اٹھایا جس کی خبر سوشل میڈیا پر وائرل ہوگئی۔ 25 سالہ سمن سکندر نامی شخص نے بریک اپ کے بعد اپنی سابق محبوبہ نادیہ کے گھر 300 کیش آن ڈیلیوری (COD) پارسلز بھیج دیے، جنہیں وصول کرنے سے انکار کے باعث ہر بار پارسل واپس چلے گئے۔
چار ماہ کے دوران 300 پارسلز، تنگ آکر پولیس سے رجوع
24 سالہ نادیہ جو ایک بینک میں ملازمت کرتی ہے، نے بتایا کہ اسے گزشتہ 4 ماہ کے دوران مختلف ای کامرس پلیٹ فارمز سے درجنوں پارسل موصول ہوئے، جنہیں اُس نے ہر بار بغیر ادائیگی کے واپس کردیا۔ جب یہ سلسلہ نہیں رکا تو اس نے ایمازون اور فلپ کارٹ پر اپنے اکاؤنٹس بند کیے اور آخرکار پولیس اسٹیشن جا کر ایف آئی آر درج کروا دی۔
تحقیقات اور سمن کا اعتراف
تحقیقات کے بعد پولیس نے سمن سکندر کو گرفتار کر لیا، جو نہ صرف نادیہ کا پڑوسی تھا بلکہ برسوں سے اُسے جانتا تھا۔ پولیس کے مطابق، سمن نے اعتراف کیا کہ بریک اپ کے بعد وہ نادیہ سے بدلہ لینا چاہتا تھا، اسی لیے اس نے مختلف جعلی نمبروں سے اسے کالز اور ٹیکسٹس کیے اور 300 پارسلز بھیجے تاکہ وہ پریشان ہو جائے۔
بریک اپ کی وجہ اور سمن کا مؤقف
پولیس کو دیے گئے بیان میں سمن کا کہنا تھا کہ نادیہ کو آن لائن شاپنگ بہت پسند تھی، اور وہ اکثر اس سے مہنگے تحائف کا مطالبہ کرتی تھی، مگر وہ ان مطالبات کو پورا نہیں کر سکتا تھا۔ اسی لیے نادیہ نے اس سے بریک اپ کر لیا، اور بدلے میں اُس نے پارسلز کے ذریعے اُسے ہراساں کیا۔
قانونی کارروائی جاری
پولیس نے ہراسانی، نجی معلومات کے غلط استعمال، اور غیرقانونی طریقے سے پارسلز بھیجنے کے الزامات کے تحت سمن کے خلاف کارروائی شروع کر دی ہے۔ سوشل میڈیا پر اس واقعے پر صارفین کی جانب سے ملے جلے ردعمل سامنے آئے ہیں، کچھ نے اسے ’عاشق کا انوکھا بدلہ‘ قرار دیا تو کچھ نے سمن کے عمل کو نفسیاتی مسائل کی علامت کہا۔
یہ بھی پڑھیں:بغیر بتائے ماں کو گھر دلانے پر امریکی خاتون نے منگنی توڑ دی