سرحدی صورتحال پر ڈی جی آئی ایس پی آر کا سخت ردعمل
ڈی جی آئی ایس پی آر میجر جنرل احمد شريف چوہدری نے بھارت کو واضح پیغام دیتے ہوئے کہا ہے کہ اگر جنگ بندی کی خلاف ورزی کی گئی تو پاکستان اس کا بھرپور اور مؤثر جواب دے گا۔ ان کا کہنا تھا کہ لائن آف کنٹرول (ایل او سی) پر مکمل چوکسی ہے اور پاک فوج ہر ممکن جارحیت کا منہ توڑ جواب دینے کی صلاحیت رکھتی ہے۔
بھارتی اشتعال انگیزی کا منہ توڑ جواب دیا جائے گا
میجر جنرل احمد شريف چوہدری نے زور دے کر کہا کہ پاک فوج کسی بھی بھارتی اشتعال انگیزی یا بلااشتعال فائرنگ کو ہرگز برداشت نہیں کرے گی۔ اگر بھارت نے کسی بھی قسم کی خلاف ورزی کی تو اس کے نتائج کی مکمل ذمہ داری خود بھارت پر عائد ہوگی۔ انہوں نے مزید کہا کہ ماضی میں بھی پاکستان نے ہر جارحیت کا جواب مؤثر انداز میں دیا ہے اور آئندہ بھی اپنی سرحدوں کا دفاع ہر قیمت پر کیا جائے گا۔
امن کی خواہش کو کمزوری نہ سمجھا جائے
ڈی جی آئی ایس پی آر نے واضح کیا کہ پاکستان خطے میں امن کا خواہاں ہے لیکن ہماری امن کی خواہش کو ہرگز کمزوری نہ سمجھا جائے۔ انہوں نے کہا کہ پاکستانی افواج مکمل تیار ہیں اور کسی بھی چیلنج کا سامنا کرنے کی بھرپور صلاحیت رکھتی ہیں۔
عوام کے تعاون اور افواج کے جذبے سے سرحدیں محفوظ
میجر جنرل احمد شريف چوہدری نے کہا کہ پاکستانی قوم کا اعتماد اور تعاون افواج پاکستان کا سب سے بڑا سرمایہ ہے، عوام اور افواج کے باہمی ربط سے ملک کی سرحدیں مکمل طور پر محفوظ ہیں، کسی کو ملک کی سالمیت پر انگلی اٹھانے کی اجازت نہیں دی جائے گی۔
یہ بھی پڑھیں:پاکستان کی مسلح افواج نے قوم سے کیا ہوا وعدہ نبھایا: ڈی جی آئی ایس پی آر