گوگل کی سرچ مارکیٹ میں اجارہ داری ختم کرنے کی کوشش
غیر ملکی خبر رساں ایجنسی کے مطابق امریکی محکمہ انصاف آن لائن سرچ مارکیٹ میں گوگل کی اجارہ داری ختم کرنے کے لیے گوگل کو اس کا مقبول کروم براؤزر فروخت کرنے پر مجبور کر رہا ہے۔ چند ماہ قبل امریکی محکمہ انصاف کی جانب سے وفاقی عدالت کو یہ تجویز پیش کی گئی تھی کہ گوگل کو اپنا کروم براؤزر فروخت کر دینا چاہیے تاکہ سرچ مارکیٹ میں مسابقت کو فروغ دیا جا سکے۔
یاہو کی کروم براؤزر خریدنے میں دلچسپی
ٹیکنالوجی رپورٹس کے مطابق امریکی انٹرنیٹ کمپنی یاہو کے مالک کی جانب سے گوگل کا کروم براؤزر خریدنے میں دلچسپی ظاہر کی گئی ہے۔ سینئر ایگزیکٹو کے مطابق اگر وفاقی عدالت گوگل کو براؤزر فروخت کرنے پر مجبور کرتی ہے تو یاہو کے مالکان اس خریداری کے لیے باقاعدہ بولی لگائیں گے۔
براؤزر کی ممکنہ قیمت 10 ارب ڈالر سے زائد
رپورٹ کے مطابق یاہو سرچ کے جنرل منیجر برائن پرووسٹ نے دو روز قبل واشنگٹن میں جاری گوگل ٹرائل کے دوران مؤقف اختیار کیا کہ ان کی کمپنی کے اندازے کے مطابق کروم براؤزر کی ممکنہ فروخت کی قیمت 10 ارب ڈالرز سے زیادہ ہو سکتی ہے۔ یہ پیش رفت ٹیکنالوجی انڈسٹری میں ایک بڑی تبدیلی کا پیش خیمہ بن سکتی ہے۔
یہ بھی پڑھیں:میٹا نے نیا اے آئی ماڈل لاما 4 صارفین کیلئے متعارف کرا دیا