کیمیائی تجزیہ مکمل، زہریلے مادے کی موجودگی نہیں پائی گئی
اداکارہ حمیرا اصغر کی لاش سے لیے گئے نمونوں کی کیمیکل ایگزامن رپورٹس جامعہ کراچی کی فارنزک لیب سے موصول ہو گئی ہیں۔ تحقیقاتی ٹیم کے مطابق مجموعی طور پر 9 سیمپلز لیب کو بھیجے گئے تھے، جن کا تفصیلی کیمیکل تجزیہ کیا گیا۔ پولیس حکام نے تصدیق کی ہے کہ رپورٹ میں کسی بھی زہریلے مادے کی موجودگی کے شواہد نہیں ملے۔
حتمی موت کی وجہ ایم ایل او رپورٹ میں واضح کی جائے گی
ڈی آئی جی ساؤتھ کے مطابق، حمیرا اصغر کی موت کی حتمی وجہ تاحال سامنے نہیں آئی، تاہم ایم ایل او (میڈیکو لیگل آفیسر) کی جانب سے کل باضابطہ رپورٹ جاری کی جائے گی، جو موت کے اصل اسباب کا تعین کرے گی۔ اس رپورٹ کا انتظار تحقیقات میں اہم موڑ ثابت ہوگا۔
لاش 8 جولائی کو فلیٹ سے ملی، 8 ماہ پرانی موت کا شبہ
خیال رہے کہ حمیرا اصغر کی لاش 8 جولائی کو کراچی کے علاقے ڈیفنس فیز 6 کے اتحاد کمرشل میں واقع فلیٹ سے اُس وقت ملی جب عدالتی بیلف کرایہ کی عدم ادائیگی پر فلیٹ خالی کروانے گیا۔ دروازہ نہ کھلنے پر زبردستی اندر داخل ہونے پر ماڈل و اداکارہ کی سڑتی ہوئی لاش برآمد ہوئی۔ ابتدائی پوسٹ مارٹم رپورٹ کے مطابق لاش گلنے سڑنے کے آخری مرحلے پر تھی، جس سے ظاہر ہوتا ہے کہ موت کو تقریباً 8 ماہ گزر چکے ہیں۔
تحقیقات جاری، موت کا معمہ تاحال حل طلب
زہر نہ دیے جانے کی رپورٹ کے بعد پولیس دیگر پہلوؤں پر تحقیقات جاری رکھے ہوئے ہے، جن میں خودکشی، قدرتی موت یا دیگر اسباب شامل ہیں۔ کیس میں فلیٹ کے مالک، قریبی افراد اور ممکنہ گواہوں سے بھی بیانات ریکارڈ کیے جا رہے ہیں۔
یہ بھی پڑھیں:اداکارہ حمیرا سے آخری رابطہ کب ہوا؟ اسٹائلسٹ دانش مقصود کے اہم انکشافات