پاکستان تحریک انصاف کے بانی عمران خان کی قانونی اور سیاسی صورتحال غیر یقینی کا شکار ہے اور ایسے وقت میں امریکا میں مقیم پاکستانی ڈاکٹروں اور تاجروں پر مشتمل ایک وفد ان سے اڈیالہ جیل میں ملاقات کا خواہاں ہے۔ ذرائع کے مطابق عمران خان اس وفد کی پاکستان میں موجودگی سے آگاہ ہیں اور ملاقات کے لیے آمادگی ظاہر کی ہے۔
خاموش سفارت کاری کی نئی کوشش
اس متوقع ملاقات کی تفصیلات تو سامنے نہیں آئیں لیکن اسے ایک نئی سفارتی کوشش کے طور پر دیکھا جا رہا ہے جو عمران خان کے لیے ممکنہ قانونی یا سیاسی ریلیف حاصل کرنے کے لیے پس پردہ کی جا رہی ہے۔ یہ وفد پہلے بھی چند ماہ قبل پاکستان آ کر عمران خان اور دیگر سرکاری شخصیات سے ملاقات کر چکا ہے۔
سیاسی بیانات اور پالیسی میں تبدیلی ناگزیر
ذرائع کا کہنا ہے کہ کسی بھی بڑی پیشرفت کے لیے پی ٹی آئی کو عوامی بیانیے میں نرمی لانا ہوگی، خاص طور پر پاک فوج اور اعلیٰ کمان کے خلاف بیانات میں تبدیلی ناگزیر ہے۔ موجودہ سخت گیر رویہ بیرون ملک سے ہونے والی لابنگ اور فوجی اسٹیبلشمنٹ پر تنقید کی شکل میں کشیدگی کو مزید بڑھا رہا ہے۔
فوج کا مؤقف اور پی ٹی آئی کی داخلی سوچ
فوجی قیادت نے ایک بار پھر واضح کیا ہے کہ وہ براہ راست کسی سیاسی جماعت سے مذاکرات نہیں کرے گی بلکہ سیاسی جماعتوں کو آپس میں معاملات حل کرنے کا مشورہ دیا ہے۔ دوسری جانب پی ٹی آئی کے چند سینئر رہنما اب اس بات کو تسلیم کر رہے ہیں کہ تصادم کی پالیسی نے تعمیری مذاکرات کے امکانات کو نقصان پہنچایا ہے۔ پارٹی کے اندر سے بھی اب مطالبہ ہو رہا ہے کہ عمران خان کے لیے کسی ممکنہ ریلیف کے حصول کے لیے محتاط اور ذمہ دارانہ اقدامات کیے جائیں۔
یہ بھی پڑھیں: ہماری فورسز نے مودی کے عزائم ناکام بنائے، مزید حماقت کا خدشہ ہے: عمران خان