پاکستان کی درخواست پر بند کمرہ اجلاس میں کشیدگی پر تبادلہ خیال، عالمی برادری سے ثالثی کا مطالبہ
اقوام متحدہ کی سلامتی کونسل نے بھارت کی جانب سے سندھ طاس معاہدے کی معطلی پر شدید تحفظات کا اظہار کرتے ہوئے کہا ہے کہ اس اقدام سے جنوبی ایشیا میں کشیدگی مزید بڑھ سکتی ہے، جو علاقائی امن و سلامتی کے لیے سنگین خطرہ ہے۔ پاکستان کی درخواست پر بلایا گیا یہ بند کمرہ اجلاس خطے کی موجودہ صورت حال پر تبادلہ خیال کے لیے منعقد کیا گیا۔
بھارتی اقدامات پر پاکستانی مؤقف پیش
دفتر خارجہ کے ترجمان کے مطابق اجلاس میں پاکستانی مندوب عاصم افتخار نے بھارت کے 23 اپریل کو کیے گئے اقدامات پر روشنی ڈالی، جن میں سندھ طاس معاہدے کی معطلی، مقبوضہ وادی میں غیر قانونی اقدامات، اور پاکستان کے آبی حقوق کی خلاف ورزی شامل ہیں۔ انہوں نے کہا کہ بھارت مکالمے اور عالمی قانون دونوں سے انکار کر رہا ہے، اور یہ رویہ خطے میں عدم استحکام کو جنم دے سکتا ہے۔
عالمی امن کیلئے اقوام متحدہ کی ثالثی کی ضرورت پر زور
سلامتی کونسل کے ارکان نے اتفاق کیا کہ بھارت کے اقدامات سے پیدا ہونے والی صورت حال کو فوری طور پر سنجیدگی سے لینا چاہیے۔ اجلاس میں فوجی محاذ آرائی سے بچنے، سفارتی بات چیت کو فروغ دینے اور آبی تنازعات کا پرامن حل تلاش کرنے پر زور دیا گیا۔ پاکستانی مندوب نے واضح کیا کہ دریاؤں کے بہاؤ کو روکنا یا ان کا رخ موڑنا دراصل اعلانِ جنگ کے مترادف ہے۔
پاکستان نے عالمی برادری سے مدد مانگ لی
پاکستان نے اقوام متحدہ کے سیکرٹری جنرل اور سلامتی کونسل سے مطالبہ کیا کہ وہ فوری ثالثی کا کردار ادا کریں تاکہ سندھ طاس معاہدے کی اصل روح کے مطابق آبی حقوق کو محفوظ بنایا جا سکے۔ ترجمان کے مطابق بھارت کی حالیہ سرگرمیاں بین الاقوامی قوانین کی خلاف ورزی ہیں، اور اگر اس کا بروقت سدباب نہ کیا گیا تو اس کے نتائج خطرناک ہو سکتے ہیں۔
یہ بھی پڑھیں:آئی ایم ایف نے پاکستانی امداد روکنے کا بھارتی مطالبہ نظرانداز کردیا