بھارت اور امریکا کی اعلیٰ سطح ملاقات
بھارت کے سیکرٹری خارجہ شری وکرم مصری نے امریکا کے نائب وزیر خارجہ کرسٹوفر لنڈاو سے واشنگٹن میں تین روزہ سرکاری دورے کے دوران ملاقات کی۔ یہ ملاقات ایک ایسے وقت میں ہوئی جب بھارت کی جانب سے پاکستان کے خلاف جارحانہ بیانیہ اور فوجی اقدامات سامنے آ رہے ہیں۔
امریکی موقف: امن اولین ترجیح
ذرائع کے مطابق امریکا نے بھارت کو دو ٹوک انداز میں پیغام دیا کہ علاقائی امن و استحکام متاثر نہ ہو۔ امریکا نے زور دیا کہ نئی دہلی کسی بھی قسم کی جارحیت سے باز رہے تاکہ جنوبی ایشیا میں کشیدگی نہ بڑھے۔
بھارت کی جارحیت اور پاکستان کا دفاعی ردعمل
یاد رہے کہ بھارت نے 6 مئی کو مقبوضہ کشمیر میں سیاحوں کے قتل کا الزام پاکستان پر لگا کر فوجی چڑھائی کی کوشش کی تھی، جس پر پاکستان نے مؤثر دفاع کرتے ہوئے بھارت کے 5 طیارے اور ایک ڈرون مار گرائے، جبکہ دفاعی نظام ایس 400 کو بھی تباہ کیا۔ پاکستان نے ان تمام بھارتی فوجی اڈوں پر جوابی کارروائی کی جہاں سے میزائل فائر کیے گئے تھے۔
مودی سرکار کا اشتعال انگیز رویہ
اس کشیدگی کے دوران بھارتی وزیراعظم نریندر مودی کا اشتعال انگیز بیان سامنے آیا جس میں انہوں نے کہا کہ “پاکستانی روٹی کھائیں ورنہ میری گولی تو ہے ہی”۔ اس بیان نے حالات کو مزید پیچیدہ کر دیا۔
امریکی تحفظات اور تجارتی تقاضے
امریکا نے بھارت پر نہ صرف امن برقرار رکھنے کا زور دیا بلکہ مارکیٹ رسائی کے عمل کو شفاف بنانے، مائیگریشن اور انسداد منشیات کے شعبے میں تعاون بڑھانے کی ضرورت پر بھی زور دیا۔
پاکستان کی سفارتی کامیابی
بھارتی سیکرٹری خارجہ اور امریکی نائب وزیر خارجہ کی ملاقات کے بعد جاری کیے گئے امریکی محکمہ خارجہ کے اعلامیہ میں پاکستان کا ذکر تک نہیں کیا گیا، جسے سفارتی حلقے پاکستان کی ایک اور اہم کامیابی قرار دے رہے ہیں۔
پاک بھارت کشیدگی میں امریکا کا توازن قائم رکھنے کا عزم
امریکی وزارت خارجہ نے پاک بھارت تنازعات کو “انتہائی سنجیدہ اور پیچیدہ” قرار دیتے ہوئے عندیہ دیا ہے کہ امریکا اس صورت حال میں توازن قائم رکھنے اور خطے میں امن کے فروغ کے لیے اپنا کردار جاری رکھے گا۔