آبی جارحیت میں اضافہ
بھارت نے پاکستان کے خلاف آبی جارحیت کو مزید تیز کرتے ہوئے بگلیہار ڈیم کے بعد سلال ڈیم کے دروازے بھی بند کر دیے ہیں۔ اس اقدام کے نتیجے میں دریائے چناب میں پانی کے بہاؤ میں شدید کمی واقع ہوئی ہے۔ اطلاعات کے مطابق صرف دو دن میں بھارت نے دریائے چناب میں 35 ہزار 600 کیوسک پانی کا بہاؤ کم کر دیا، جس کے بعد پانی کی آمد محض 5 ہزار 300 کیوسک رہ گئی ہے۔
دریاؤں کا بہاؤ متاثر
بھارتی میڈیا کا دعویٰ ہے کہ اب بھارت کشن گنگا ڈیم سے بھی پانی روکنے کا منصوبہ بنا رہا ہے، جس سے دریائے جہلم میں پانی کی مقدار مزید کم ہونے کا خدشہ ہے۔ یاد رہے کہ 26 اپریل کو بھی بھارت نے بغیر اطلاع دیے دریائے جہلم میں بڑا سیلابی ریلا چھوڑا، جس سے چکوٹھی کے مقام پر پانی کی سطح 15 فٹ تک بلند ہو گئی تھی۔
سیاسی تناظر اور پاکستان کا ردعمل
22 اپریل کو پہلگام میں ہونے والے فائرنگ کے واقعے کے بعد، جس میں 26 افراد ہلاک ہوئے، بھارت نے بغیر شواہد پاکستان پر الزام عائد کیا اور روایتی ہٹ دھرمی کا مظاہرہ کرتے ہوئے سندھ طاس معاہدے کی یکطرفہ معطلی کا اعلان کیا۔ پاکستان نے بھارت کے اس اقدام کو مسترد کرتے ہوئے اسے غیرقانونی قرار دیا ہے۔
بین الاقوامی سطح پر معاملہ اجاگر کرنے کی تیاری
پاکستان اس معاملے کو اقوام متحدہ میں لے جانے کا فیصلہ کر چکا ہے اور عالمی برادری کو بھارتی آبی جارحیت سے آگاہ کرنے کی کوششوں میں مصروف ہے۔ ماہرین کے مطابق بھارت معاہدے کو یکطرفہ طور پر ختم نہیں کر سکتا اور اسے مذاکرات کی میز پر آنا ہوگا۔
یہ بھی پڑھیں:بھارت کی ایک بار پھر آبی دہشتگردی، پاکستان کی طرف آتا پانی روکنا شروع کر دیا