محدود صلاحیت: بھارت گرمیوں میں پانی نہیں روک سکتا
سابق انڈس واٹر کمشنر شیراز میمن نے بھارت کی جانب سے پاکستان کے لیے پانی کی روانی روکنے کے دعوؤں پر ردعمل دیتے ہوئے کہا ہے کہ بھارت کے پاس گرمیوں کے موسم میں پانی روکنے کی گنجائش بہت محدود ہے۔ انہوں نے واضح کیا کہ بگلیہار ڈیم جیسے اسٹرکچرز کے ذریعے بھارت صرف چند گھنٹوں کے لیے پانی روک سکتا ہے کیونکہ گرمیوں میں پانی کی آمد بہت زیادہ ہوتی ہے اور اس کا اخراج ناگزیر ہو جاتا ہے۔
سردیوں میں پانی روکنے کا امکان اور محدود اختیارات
شیراز میمن نے کہا کہ بھارت صرف سردیوں کے مہینوں میں پانی روکنے کی تھوڑی بہت کوشش کر سکتا ہے کیونکہ ان دنوں پانی کی مقدار میں کمی ہوتی ہے، لیکن وہ بھی محدود مدت کے لیے۔ انہوں نے نشاندہی کی کہ اس کے باوجود بھارت کے پاس بین الاقوامی معاہدوں کی پابندی لازم ہے اور وہ طویل مدتی طور پر سندھ طاس معاہدے کی خلاف ورزی نہیں کر سکتا۔
مذاکرات اور قانونی راستہ ناگزیر ہے
شیراز میمن نے زور دیا کہ بھارت کو جلد یا بدیر پانی کے مسئلے پر پاکستان کے ساتھ مذاکرات کی میز پر آنا ہی پڑے گا۔ انہوں نے کہا کہ بھارت کو علم ہے کہ وہ سندھ طاس معاہدے کو یکطرفہ طور پر ختم نہیں کر سکتا کیونکہ یہ عالمی بینک کی ثالثی میں طے پایا گیا معاہدہ ہے اور اس کے ضامن بھی بین الاقوامی ادارے ہیں۔
پاکستان کا اقوام متحدہ سے رجوع بروقت اقدام قرار
سابق کمشنر نے حکومت پاکستان کی جانب سے اقوام متحدہ میں بھارت کی آبی جارحیت کے خلاف جانے کے فیصلے کو بروقت اور مثبت قدم قرار دیا۔ ان کے مطابق دنیا کو بھارت کی جانب سے سندھ طاس معاہدے کی خلاف ورزیوں سے آگاہ رکھنا ضروری ہے تاکہ عالمی دباؤ کے تحت بھارت کو اپنی روش بدلنے پر مجبور کیا جا سکے۔
جنگ کا امکان کم، قانونی دباؤ ضروری
شیراز میمن نے کہا کہ بھارت اور پاکستان دونوں ایٹمی قوتیں ہیں اس لیے براہِ راست جنگ کا امکان نہیں، لیکن پانی جیسے حساس معاملے پر بھارت کی اشتعال انگیزی کو روکنے کے لیے عالمی سطح پر قانونی اور سفارتی دباؤ بڑھانے کی ضرورت ہے۔ ان کا کہنا تھا کہ عالمی بینک اور غیر جانبدار ماہرین کو سندھ طاس معاہدے کے تحفظ میں فعال کردار ادا کرنا ہوگا۔
یہ بھی پڑھیں:بھارت کی ایک بار پھر آبی دہشتگردی، پاکستان کی طرف آتا پانی روکنا شروع کر دیا