زلزلے کے جھٹکوں نے جیل میں افراتفری پھیلا دی
پیر کی رات کراچی کے مختلف علاقوں میں زلزلے کے جھٹکے محسوس کیے گئے، جن کے دوران ملیر جیل میں قیدیوں کو بیرکوں سے باہر نکالا گیا۔ اس موقع پر افراتفری مچ گئی، قیدیوں نے پولیس اہلکاروں سے ہاتھا پائی کی، اسلحہ چھینا، فائرنگ کی، اور 200 سے زائد قیدی فرار ہوگئے۔
ڈی آئی جی جیل کا ابتدائی مؤقف اور نقصانات کی تفصیلات
ڈی آئی جی جیل محمد حسن سہتو کے مطابق زلزلے کے دوران قیدیوں نے ماڑی گیٹ توڑا اور پولیس پر تشدد کیا۔ ایک قیدی ہلاک ہوا جبکہ 3 قیدی، 3 ایف سی اہلکار اور 2 جیل پولیس اہلکار زخمی ہوئے جنہیں جناح اسپتال منتقل کیا گیا۔ جیل کی دیواریں نہیں ٹوٹیں بلکہ قیدی گیٹ توڑ کر نکلے۔
80 قیدی دوبارہ گرفتار، باقی کی تلاش جاری
جیل سپرنٹنڈنٹ ارشد شاہ کے مطابق 216 قیدی فرار ہوئے جن میں سے 80 دوبارہ گرفتار کر لیے گئے۔ فرار ہونے والے قیدیوں کی ویڈیوز بھی شہریوں نے بنائیں، جنہیں قذافی ٹاؤن، شاہ لطیف، اور بھینس کالونی سے دوبارہ حراست میں لیا گیا۔ 135 قیدی تاحال مفرور ہیں۔
وزیر داخلہ و وزیر جیل کا نوٹس، رپورٹ طلب
وزیر داخلہ سندھ ضیا لنجار نے کہا کہ قیدی جیل کی دیوار نہیں بلکہ گیٹ سے نکلے ہیں اور ابتدائی اطلاعات کے برخلاف دیوار کو نقصان نہیں پہنچا۔ انہوں نے اعتراف کیا کہ ممکنہ کوتاہی پر تحقیقات ہوں گی۔ وزیر جیل علی حسن زرداری نے بھی واقعے کا نوٹس لیتے ہوئے آئی جی اور ڈی آئی جی جیل سے رپورٹ طلب کرلی ہے۔
جیل کا مکمل کنٹرول سیکیورٹی اداروں نے سنبھال لیا
پولیس، رینجرز اور ایف سی نے ملیر جیل کا کنٹرول سنبھال لیا ہے اور جیل میں سرچ آپریشن مکمل کرلیا گیا ہے۔ ملیر جیل میں قیدیوں کی گنجائش 2400 ہے جبکہ موجودہ وقت میں 6000 قیدی موجود تھے۔
کراچی میں زلزلے کی شدت اور اثرات
کراچی میں اتوار سے پیر تک 11 بار زلزلے کے جھٹکے محسوس کیے گئے۔ پیر کی رات 12 بج کر 53 منٹ پر ایک اور زلزلہ آیا جس کی شدت 3.4 ریکارڈ کی گئی۔ لانڈھی سمیت کئی علاقوں میں دیواروں میں دراڑیں پڑیں اور لوگ خوفزدہ ہو کر گھروں سے باہر نکل آئے۔
یہ بھی پڑھیں:کراچی میں زلزلے کے جھٹکے، شدت 3.6 ریکارڈ