دو گھنٹے کی تاخیر کے بعد اجلاس چند منٹ چلا، پھر ملتوی
پشاور میں خیبر پختونخوا اسمبلی کا اجلاس، جو مخصوص نشستوں پر اراکین کی حلف برداری کے لیے طلب کیا گیا تھا، دو گھنٹے سے زائد تاخیر کے بعد شروع ہوا مگر اپوزیشن کے احتجاج اور کورم پورا نہ ہونے کے باعث مختصر وقت بعد ہی ملتوی کر دیا گیا۔ اسپیکر بابر سلیم سواتی کی صدارت میں جیسے ہی اجلاس شروع ہوا، اپوزیشن ارکان نے نعرے بازی اور شور شرابا شروع کر دیا۔
اپوزیشن کا احتجاج، اسپیکر پر دباؤ
اجلاس کے دوران اپوزیشن لیڈر ڈاکٹر عباد اللہ نے اسپیکر کو آڑے ہاتھوں لیتے ہوئے کہا کہ ایک سال سے زیادہ ہو گیا مگر مخصوص نشستوں پر ارکان سے حلف نہیں لیا جا رہا۔ انہوں نے کہا کہ اگر اسپیکر نے حلف نہ لیا تو ہم عدالت سے رجوع کریں گے تاکہ چیف جسٹس پشاور ہائی کورٹ اراکین سے حلف لیں۔
پی ٹی آئی کی کورم نشاندہی، اجلاس میں بدنظمی
اجلاس کے آغاز پر ہی پی ٹی آئی کے رکن شیر علی آفریدی نے کورم کی نشاندہی کر دی، جس کے بعد گھنٹیاں بجا کر اراکین کو ایوان میں بلانے کی کوشش کی گئی، مگر حکومتی ارکان ایوان میں نہ پہنچے۔ اسپیکر کورم مکمل نہ ہونے پر اجلاس چھوڑ کر چلے گئے اور اسمبلی کا اجلاس 24 جولائی تک ملتوی کر دیا گیا۔
اسپیکر کا مبہم موقف اور مسکراتا جواب
میڈیا سے بات کرتے ہوئے اسپیکر بابر سلیم سواتی نے کہا کہ جب اجلاس ہوگا تو حلف برداری کی کارروائی بھی ہوگی، اور مسکرا کر کہا “کبھی نہ کبھی تو ہو گی”۔ اس غیر سنجیدہ رویے پر اپوزیشن نے مزید تنقید کی۔
پی ٹی آئی کا بائیکاٹ، اراکین کو اسمبلی ہال نہ جانے کی ہدایت
وزیراعلیٰ علی امین گنڈاپور کی زیر صدارت پی ٹی آئی کی پارلیمانی پارٹی کا اجلاس منعقد ہوا جس میں اسمبلی سیشن کے بائیکاٹ کا فیصلہ کیا گیا۔ اراکین کو ہدایت کی گئی کہ وہ اسمبلی ہال نہ جائیں تاکہ اجلاس میں حلف برداری کی کارروائی رک جائے۔
سیاسی محاذ آرائی میں شدت
مخصوص نشستوں پر حلف برداری میں مسلسل تاخیر اور پی ٹی آئی کے بائیکاٹ سے خیبر پختونخوا اسمبلی میں سیاسی کشیدگی میں مزید اضافہ ہو گیا ہے۔ اپوزیشن کا مطالبہ ہے کہ جمہوری طریقے سے منتخب خواتین اور اقلیتی اراکین کو حلف لینے دیا جائے، جبکہ حکومت حیلوں بہانوں سے اسے مؤخر کر رہی ہے۔