ملائیکہ اروڑا کے قابلِ ضمانت وارنٹ دوبارہ جاری، 2012 ہوٹل حملہ کیس میں عدم پیشی پر کارروائی
وارنٹ جاری ہونے کی وجہ
رپورٹس کے مطابق، عدالت نے 2012 کے مشہور ہوٹل حملہ کیس میں بطور گواہ ان کی مسلسل غیر حاضری پر دوبارہ قابلِ ضمانت وارنٹ جاری کیے ہیں۔ عدالت نے ہدایت کی ہے کہ رواں ماہ کے اختتام تک وارنٹ کی رپورٹ پیش کی جائے۔
سیف علی خان اور دیگر کی غیر حاضری
گزشتہ روز سماعت کے دوران سیف علی خان سمیت دیگر ملزمان نے حاضری سے استثنیٰ کی درخواست کی، جسے عدالت نے منظور کر لیا۔ تاہم ملائیکہ اروڑا کی مسلسل غیر حاضری پر عدالت نے 5 ہزار روپے کے قابلِ ضمانت وارنٹ دوبارہ جاری کیے۔
سابقہ وارنٹس کی تفصیلات
یہ پہلا موقع نہیں، اس سے قبل بھی 15 مارچ کو ان کے خلاف قابلِ ضمانت وارنٹ جاری کیے جا چکے ہیں۔ اُس وقت ان کی بہن امریتا اروڑا اور ایک دوست فرخ واڈیا کے بھی وارنٹ جاری ہوئے تھے۔
کیس کی تفصیلات
یہ مقدمہ 21 فروری 2012 کو کولابا کے ایک لگژری ہوٹل میں پیش آنے والے واقعے پر مبنی ہے۔ جنوبی افریقی شہری اقبال شرما نے کھانے کے دوران سیف علی خان کے دوستوں کی اونچی آواز اور شور پر اعتراض کیا، جس پر تنازع شدت اختیار کر گیا۔
مارپیٹ کا الزام
اقبال شرما کا الزام ہے کہ سیف علی خان نے ان کی ناک پر گھونسہ مارا جس سے ہڈی ٹوٹ گئی، اور جھگڑا اقبال کے سسر رمن بھائی پٹیل تک پہنچا، جنہیں بھی مبینہ طور پر تشدد کا نشانہ بنایا گیا۔
ملائیکہ کی بطور گواہ طلبی
ملائیکہ اروڑا اس واقعے کے وقت وہاں موجود تھیں، اس لیے عدالت نے انہیں بطور گواہ طلب کیا تھا۔ لیکن ان کی بار بار غیر حاضری کے باعث عدالت کو دوبارہ وارنٹ جاری کرنے پڑے۔
یہ بھی پڑھیں:سونو نگم پر کانسرٹ کے دوران پتھر اور بوتلیں پڑ گئیں