حملے کا پس منظر
6 اور 7 مئی 2025 کی درمیانی شب بھارت کی جانب سے کی جانے والی جارحیت کے دوران کئی معصوم پاکستانی شہری شہید ہوئے جن میں خواتین، بچے، بزرگ اور نوجوان شامل تھے۔ ان ہی شہداء میں لاہور کے علاقے کوٹ لکھپت سے تعلق رکھنے والا 20 سالہ نوجوان حیدر علی بھی شامل تھا جو اپنی 8 بہنوں کا اکلوتا بھائی اور اپنے گھر کا واحد کفیل تھا۔
شہادت کا لمحہ
اردو نیوز کی رپورٹ کے مطابق حیدر علی نے محض تین دن قبل ہی راولپنڈی کرکٹ اسٹیڈیم کے قریب پی ایس ایل میچز کے دوران لگنے والے فوڈ اسٹریٹ میں ایک اسٹال لگایا تھا، جہاں وہ چپس اور دیگر کھانے پینے کی اشیاء فروخت کرتا تھا۔ 7 مئی کی صبح 10 بجے کے قریب وہ دیگر مزدوروں کے ساتھ قریبی ریسٹورینٹ کے شیڈ کے نیچے سورہا تھا کہ بھارتی ڈرون نے حملہ کیا۔
حملے کی شدت اور انجام
ڈرون سیدھا حیدر علی سے آ ٹکرایا، جس کے نتیجے میں زور دار دھماکہ ہوا، ریسٹورینٹ کے شیشے ٹوٹ گئے، شیڈ زمین بوس ہوگیا اور کئی افراد زخمی ہوئے۔ حیدر علی کو شدید زخم آئے اور وہ بینظیر بھٹو شہید اسپتال میں زخموں کی تاب نہ لاتے ہوئے جام شہادت نوش کر گیا۔
گھر والوں کا غم اور دکھ
حیدر علی کے چچا زاد بھائی نے بتایا کہ وہ اپنے خاندان کا واحد سہارا تھا، اور کچھ ہی دن پہلے روزگار کی تلاش میں راولپنڈی آیا تھا۔ اس کی لاش اس کے آبائی علاقے منتقل کر کے سپرد خاک کر دی گئی۔ حیدر علی کی شہادت نے پورے علاقے کو غم میں مبتلا کردیا، اور سوشل میڈیا پر بھی ان کے لیے تعزیتی پیغامات کا سلسلہ جاری ہے۔
یہ بھی پڑھیں:ایس 400 کی تباہی: بھارت کے فضائی دفاعی نظام کو پاکستانی جے ایف 17 تھنڈر نے نشانہ بنایا