مریم نواز کا آپریشن بنیان المرصوص پر فخر: یہ تاریخ میں سنہری حروف سے لکھا جائے گا

پاک افواج کو خراجِ تحسین

وزیراعلیٰ پنجاب مریم نواز نے 10 مئی کی صبح بھارتی جارحیت کے خلاف آپریشن بنیان المرصوص کے تحت پاک فوج کی طرف سے کی گئی کامیاب اور بھرپور جوابی کارروائی پر فخر کا اظہار کرتے ہوئے کہا ہے کہ یہ دشمن کو ایک ’’عبرت ناک‘‘ سبق ہے۔ انہوں نے کہا کہ یہ جواب محض عسکری نہیں بلکہ غیرت، حکمت اور شجاعت سے بھرا ہوا تھا، جو تاریخ میں سنہری حروف سے لکھا جائے گا۔

پاکستان کی خاموشی کو کمزوری نہ سمجھا جائے

مریم نواز نے کہا کہ ’’ہم کمزور نہیں ہیں، امن کے لیے خاموش تھے، مگر جب دشمن نے حد پار کی تو ہم نے صبر کو حکمت میں بدلا اور کڑی ضرب لگائی۔‘‘ انہوں نے کہا کہ آپریشن بنیان المرصوص صرف جوابی کارروائی نہیں بلکہ یہ ایک تاریخی اعلان ہے کہ پاکستان امن چاہتا ہے، مگر اپنی خودمختاری پر کوئی سمجھوتہ نہیں کرتا۔

سرحدیں صرف باڑ سے محفوظ نہیں ہوتیں

انہوں نے کہا کہ پاکستان کی سرحدیں صرف خاردار تاروں سے نہیں بلکہ شہیدوں کے لہو سے محفوظ ہیں۔ مریم نواز نے سپاہیوں کو سلام پیش کرتے ہوئے کہا کہ وہ قوم کے اصل محافظ ہیں جنہوں نے دشمن کو نہ صرف طاقت سے بلکہ حکمت سے جواب دیا۔

آپریشن کی تفصیلات

واضح رہے کہ پاکستان نے بھارتی جارحیت کا بھرپور جواب دیتے ہوئے ادھم پور، آدم پور، اور پٹھان کوٹ ایئر بیسز سمیت کئی فوجی تنصیبات کو تباہ کر دیا، جبکہ مہاراشٹرا کی الیکٹرک کمپنی پر سائبر حملے سے بجلی کا نظام اور ملٹری سیٹلائٹ سسٹم مکمل طور پر جام کر دیا۔ یہ کارروائی پاکستان کے دفاعی عزم اور جدید حکمت عملی کا مظہر قرار دی جا رہی ہے۔

یہ بھی پڑھیں:بھارت کیخلاف آپریشن: وزیر اعظم نے نیشنل کمانڈ اتھارٹی کی اہم میٹنگ طلب کرلی