شدید بارشوں کی پیشگوئی
نیشنل ڈیزاسٹر مینجمنٹ اتھارٹی (این ڈی ایم اے) نے آئندہ 24 گھنٹوں کے دوران ملک کے مختلف حصوں میں شدید بارشوں کی پیشگوئی کرتے ہوئے الرٹ جاری کر دیا ہے۔ ترجمان کے مطابق اسلام آباد اور راولپنڈی میں آئندہ 24 سے 48 گھنٹوں تک وقفے وقفے سے تیز بارش کا امکان ہے، جس سے نالہ لئی میں طغیانی اور نشیبی علاقوں میں سیلابی کیفیت پیدا ہو سکتی ہے۔
نشیبی علاقوں کے رہائشیوں کو فوری تیاری کی ہدایت
این ڈی ایم اے نے نالہ لئی کے قریبی اور نشیبی علاقوں میں رہنے والے شہریوں کو خبردار کیا ہے کہ خطرے کا سائرن بجنے پر فوری انخلاء کی تیاری رکھیں۔ ترجمان کا کہنا ہے کہ شہریوں کو چاہیے کہ وہ متعلقہ اداروں کے ساتھ مکمل تعاون کریں تاکہ کسی بھی ممکنہ نقصان سے بچا جا سکے۔
پنجاب کے دیگر اضلاع بھی خطرے میں
ادارے کے مطابق لاہور، چکوال، اٹک، جہلم، خوشاب، سرگودھا، گجرات، گوجرانوالہ، فیصل آباد، سیالکوٹ، نارووال، اوکاڑہ، قصور، شیخوپورہ اور حافظ آباد میں بھی شدید بارش کا امکان ہے۔ ان علاقوں میں ندی نالوں میں طغیانی اور شہری سیلاب کی صورتحال پیدا ہونے کا خطرہ ہے، جس کے لیے مقامی انتظامیہ کو ہائی الرٹ کر دیا گیا ہے۔
حفاظتی اقدامات کی یقین دہانی
ترجمان نے بتایا کہ این ڈی ایم اے اور متعلقہ ادارے تمام ضروری اقدامات کر رہے ہیں تاکہ ہنگامی صورتحال میں فوری ردعمل دیا جا سکے۔ شہریوں کو تاکید کی گئی ہے کہ وہ سرکاری ہدایات پر عمل کرتے ہوئے اپنی اور دوسروں کی جانوں کی حفاظت یقینی بنائیں۔
یہ بھی پڑھیں:چکوال میں 400 ملی میٹر سے زائد بارش، سیلابی ایمرجنسی نافذ