کراچی میں کبوتروں سے پھیلنے والی پھیپھڑوں کی بیماری میں تشویشناک اضافہ

کراچی میں کبوتروں سے انسانوں میں منتقل ہونے والی پھیپھڑوں کی ایک خطرناک بیماری “برڈ فینسرز لنگز” کے کیسز میں نمایاں اضافہ دیکھنے میں آیا ہے۔

ماہرین کی تشویش

ماہر امراض تنفس ڈاکٹر محمد عرفان کے مطابق نجی اسپتالوں میں ہفتہ وار 15 سے 20 کیسز رپورٹ ہو رہے ہیں، جن میں زیادہ تر مریض خواتین ہیں۔ یہ بیماری کبوتر کے پروں اور فضلے کے ذرات کے باعث پیدا ہوتی ہے جو سانس کی نالی میں داخل ہوکر الرجی اور پھیپھڑوں کی سوجن کا باعث بنتے ہیں۔

بیماری کی علامات اور شدت

متاثرہ افراد کو بعض اوقات اسٹیرائڈز، آکسیجن یا یہاں تک کہ پھیپھڑوں کی پیوندکاری کی ضرورت پڑسکتی ہے۔ ڈاکٹر عرفان کا کہنا ہے کہ کبوتروں سے دوری اور گھروں کی کھڑکیوں، اے سی وغیرہ میں صفائی کے بہتر انتظامات سے بیماری سے بچاؤ ممکن ہے۔

حکومتی اسپتالوں کی رپورٹ

دوسری طرف سول اسپتال حکام کا کہنا ہے کہ سانس کی بیماریوں کے کیسز تو رپورٹ ہو رہے ہیں، لیکن ان میں کبوتروں سے متعلقہ بیماریوں کی کوئی باقاعدہ درجہ بندی موجود نہیں۔ بعض خواتین میں بغیر واضح وجہ کے سانس پھولنے کی شکایات ضرور ملی ہیں۔

انتباہ اور احتیاطی تدابیر

ماہرین نے خبردار کیا ہے کہ جو لوگ کبوتروں کے قریب رہتے ہیں، انہیں خصوصی احتیاط برتنی چاہیے۔ صفائی، وینٹیلیشن کی بہتری اور پرندوں سے مناسب فاصلہ اس مرض سے بچاؤ میں مددگار ہو سکتا ہے۔

یہ بھی پڑھیں:کورونا وائرس کا آغاز کہاں سے ہوا؟ چین نے وائٹ پیپر جاری کردیا