پنجاب اسمبلی کے حلقہ پی پی 52 سیالکوٹ کے ضمنی انتخاب میں پاکستان مسلم لیگ (ن) نے واضح برتری کے ساتھ کامیابی حاصل کرلی ہے۔ حنا ارشد وڑائچ نے آزاد امیدوار فاخر نشاط گھمن کو بھاری مارجن سے شکست دے دی۔
پولنگ کا عمل اور سیاسی گہما گہمی
سمبڑیال میں صوبائی اسمبلی کی نشست پر ضمنی انتخاب کے لیے پولنگ صبح 8 بجے سے شام 5 بجے تک پرامن طور پر جاری رہی، تاہم دوران پولنگ کچھ مقامات پر کارکنوں کے درمیان جھگڑے اور نعرے بازی دیکھنے میں آئی، جبکہ مخالف امیدواروں کی جانب سے دھاندلی کے الزامات بھی لگائے گئے۔
نتائج اور ووٹوں کی تفصیل
تمام 185 پولنگ اسٹیشنز سے موصول ہونے والے غیر حتمی و غیر سرکاری نتائج کے مطابق مسلم لیگ (ن) کی امیدوار حنا ارشد وڑائچ نے 78,419 ووٹ حاصل کیے، جبکہ پی ٹی آئی کے حمایت یافتہ آزاد امیدوار فاخر نشاط گھمن 40,037 ووٹ لے کر دوسرے نمبر پر رہے۔
ن لیگی امیدوار اور وزیراعلیٰ پنجاب کا ردعمل
جیو نیوز سے گفتگو کرتے ہوئے حنا ارشد وڑائچ نے کامیابی پر اظہار تشکر کرتے ہوئے کہا کہ “عوام نے مجھے سیاست نہیں بلکہ خدمت کے لیے منتخب کیا ہے۔ میں آج جس مقام پر کھڑی ہوں، وہ مریم نواز کی بدولت ہے، اگر وزیراعلیٰ پنجاب مجھ پر اعتماد نہ کرتیں تو یہاں نہ ہوتی۔”
وزیراعلیٰ پنجاب مریم نواز نے بھی پی پی 52 سے ن لیگی کامیابی پر حنا ارشد وڑائچ کو مبارکباد دی۔ انہوں نے کہا کہ “سمبڑیال کے عوام نے جس اعتماد کا اظہار کیا ہے، ہم اس پر پورا اتریں گے۔ یہ کامیابی حکومت کی عوامی پالیسیوں پر اعتماد کی علامت ہے۔”
نواز شریف کی قیادت میں ترقی کا سفر جاری
مریم نواز کا کہنا تھا کہ عوام اب جان چکے ہیں کہ خدمت کرنے والے کون ہیں اور فتنہ و فساد پھیلانے والے کون۔ مسلم لیگ (ن) کی یہ جیت ثابت کرتی ہے کہ نواز شریف کی قیادت میں ملک کا ترقیاتی سفر تیزی سے آگے بڑھ رہا ہے۔