ریسکیو 1122 اور صوبائی ڈیزاسٹر مینجمنٹ اتھارٹی (PDMA) کی رپورٹ کے مطابق جمعرات کے روز صوبہ پنجاب کے مختلف علاقوں میں موسلا دھار بارشوں کے نتیجے میں کم از کم 10 افراد جاں بحق ہو گئے۔ شدید بارشوں نے کئی اضلاع کو متاثر کیا، جہاں شہری زندگی مفلوج ہوکر رہ گئی۔
ریسکیو حکام کے مطابق گزشتہ 24 گھنٹوں میں 46 افراد کو ایمرجنسی سروسز فراہم کی گئیں، جن میں سے 39 افراد کو مختلف اسپتالوں میں منتقل کیا گیا، جبکہ 7 افراد موقع پر ہی جاں بحق ہو گئے۔ بارش سے جنوبی پنجاب کے بعض علاقوں میں گرمی کی شدت میں کمی ضرور آئی، مگر نقصانات نے صورت حال کو تشویشناک بنا دیا۔
رپورٹ کے مطابق سب سے زیادہ ایمرجنسی کیسز اوکاڑہ سے رپورٹ ہوئے جہاں 8 افراد کو مدد فراہم کی گئی۔ ملتان میں 4، فیصل آباد، منڈی بہاؤالدین، جھنگ اور چنیوٹ میں 2، جبکہ لاہور، قصور، جہلم، ساہیوال، مری، مظفرگڑھ، بہاولنگر اور خانیوال میں 1،1 ایمرجنسیز رپورٹ ہوئیں۔
حکام نے مزید بارشوں کی صورت میں عوام سے محتاط رہنے اور نشیبی علاقوں میں نقل و حرکت سے گریز کرنے کی ہدایت کی ہے۔
یہ بھی پڑھیں:کراچی کے مختلف علاقوں میں گرج چمک کے ساتھ تیز بارش، موسم خوشگوار ہوگیا