رجب بٹ کے خلاف پیکا ایکٹ اور توہین مذہب کے تحت مقدمہ درج

پاکستانی یوٹیوبر اور وی لاگر رجب بٹ کے خلاف لاہور میں مقدمہ درج کر لیا گیا ہے۔ اس مقدمے کی ایف آئی آر تھانہ نشتر کالونی میں درج کی گئی، جس میں پیکا ایکٹ اور مذہبی جذبات کو مجروح کرنے کی دفعات شامل کی گئی ہیں۔

ایف آئی آر میں الزام عائد کیا گیا ہے کہ رجب بٹ نے اپنے بیانات میں دفعہ 295 اے اور 295 سی کی خلاف ورزی کی۔ یاد رہے کہ گزشتہ سال دسمبر میں بھی رجب بٹ کو غیر قانونی طور پر شیر کا بچہ اور اسلحہ رکھنے پر گرفتار کیا گیا تھا۔ بعد ازاں عدالت نے انہیں 50 ہزار روپے جرمانہ اور ایک سال تک کمیونٹی سروس کی سزا سنائی تھی۔

مقدمے میں پرفیوم اور سدھو موسے والا کا ذکر

ایف آئی آر میں رجب بٹ کے متعارف کردہ پرفیوم اور بھارتی گلوکار سدھو موسے والا کا بھی ذکر کیا گیا ہے۔ خیال رہے کہ سدھو موسے والا کو 29 مئی 2022 کو قتل کر دیا گیا تھا، اور ان کے مشہور گانوں میں سے ایک کا نام بھی “295” تھا۔

ایف آئی آر درج ہونے سے کچھ گھنٹے قبل، رجب بٹ نے ایک ویڈیو پیغام میں معذرت کی۔ ویڈیو میں وہ جائے نماز کے سامنے قرآن پاک ہاتھ میں لیے ہوئے نظر آ رہے ہیں۔ انہوں نے وضاحت دی کہ “295” نامی پرفیوم کا مقصد قانون ناموس رسالت کی توہین نہیں تھا۔ انہوں نے اعتراف کیا کہ ان سے لاعلمی میں کچھ غلط الفاظ ادا ہو گئے اور انہوں نے پرفیوم کی فروخت بند کرنے کا اعلان بھی کیا۔

وکیل کا مؤقف

رجب بٹ کے وکیل عرفان نقوی نے بتایا کہ لاہور میں مقدمہ درج ہونے سے پہلے کراچی میں بھی 295 اے کے تحت ایف آئی آر درج ہو چکی تھی۔ وکیل کے مطابق، رجب بٹ کو دفعہ 295 کے بارے میں مکمل معلومات نہیں تھیں اور انہوں نے سدھو موسے والا کے حوالے سے یہ ذکر کیا تھا۔

قانونی پہلو

پاکستانی قانون میں دفعہ 295 اے مذہبی جذبات بھڑکانے، 295 بی اور 295 سی مقدس ہستیوں کی توہین سے متعلق ہیں۔ ان دفعات کے تحت کسی بھی فرد کو وارنٹ کے بغیر گرفتار کیا جا سکتا ہے اور بغیر مجسٹریٹ کے اجازت کے تحقیقات کا آغاز کیا جا سکتا ہے۔

وکیل عرفان نقوی نے مزید کہا کہ “محض 295 کا نام لینا جرم نہیں ہے۔ اگر کسی کے گھر کا نمبر 295 ہو یا کسی گاڑی پر لکھا ہو تو کیا اسے بھی جرم سمجھا جائے گا؟” انہوں نے زور دیا کہ “جب ایک شخص قانون کی حرمت پر مکمل یقین رکھتا ہے تو اس معاملے کو مزید بڑھاوا نہیں دینا چاہیے۔”

رمضان بھٹی نامی شہری نے پولیس کو دی گئی درخواست میں الزام لگایا کہ رجب بٹ نے اس نام کے ذریعے متنازع پیغام دینے کی کوشش کی۔ ان کا کہنا تھا کہ یوٹیوبر نے بھارتی گلوکار سدھو موسے والا کے گانے “295” کی مناسبت سے یہ نام رکھا، جو مذہبی حساسیت کے پیش نظر قابل اعتراض ہے۔

یہ پہلا موقع نہیں کہ رجب بٹ کسی تنازع میں ملوث ہوئے ہوں۔ اس سے قبل بھی ان پر مشہور ٹک ٹوکر عمر فیاض بٹ کو مبینہ طور پر دھمکانے کا مقدمہ درج کیا گیا تھا۔ اطلاعات کے مطابق، رجب بٹ، مان ڈوگر اور حیدر شاہ پر الزام تھا کہ وہ مسلح افراد کے ساتھ عمر فیاض کے گھر پہنچے اور ان کے خلاف دھمکی آمیز رویہ اختیار کیا۔ عمر فیاض نے پولیس کو بتایا کہ مان ڈوگر نے ایک ٹک ٹاک لائیو سیشن کے دوران نازیبا زبان استعمال کی اور انہیں ہراساں کیا۔

یہ بھی پڑھیں:قاتلانہ دھمکیاں اور کلاشنکوف کے ساتھ گھر پہنچنے پر رجب بٹ کے خلاف مقدمہ درج

پولیس حکام کا کہنا ہے کہ معاملے کی تفتیش جاری ہے اور قانون کے مطابق کارروائی عمل میں لائی جائے گی۔ دوسری جانب، سوشل میڈیا پر اس مقدمے کے حوالے سے ملا جلا ردعمل سامنے آ رہا ہے۔ کچھ صارفین کا کہنا ہے کہ رجب بٹ کو اپنی حد میں رہنا چاہیے، جبکہ ان کے مداحوں کا مؤقف ہے کہ ان کے خلاف انتقامی کارروائی کی جا رہی ہے۔